ଡେସ୍କ: ଦେଶର ଖାଦ୍ୟ ପ୍ରଦାନକାରୀ ସଂସ୍ଥାକୁ ଶକ୍ତି ପ୍ରଦାନକାରୀରେ ପରିଣତ କରିବାକୁ ତାଙ୍କ ସରକାର ଲକ୍ଷ୍ୟ ରଖିଛନ୍ତି ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି। ଛତିଶଗଡରେ ପାଖାପାଖି ୩୫ ହଜାର କୋଟି ଟଙ୍କାର ୧୦ଟି ପ୍ରକଳ୍ପର ଭର୍ଚୁଆଲ ଉଦଘାଟନ ଓ ଶିଳାନ୍ୟାସ କରି ପ୍ରଧାନମନ୍ତ୍ରୀ କହିଥିଲେ ଯେ ଏହି ଲକ୍ଷ୍ୟ ହାସଲ କରିବା ପାଇଁ ସରକାର ସେମାନଙ୍କ ଚାଷ ଜମିରେ କ୍ଷୁଦ୍ର ସୌର ପ୍ଲାଣ୍ଟ ସ୍ଥାପନ ପାଇଁ ସହାୟତା ପ୍ରଦାନ କରୁଛନ୍ତି। ସରକାର ସୌର ଶକ୍ତି ମାଧ୍ୟମରେ ଦେଶର ଶକ୍ତି ଆବଶ୍ୟକତା ପୂରଣ କରିବା ସହ ଲୋକଙ୍କ ବିଜୁଳି ବିଲକୁ ଶୂନକୁ ହ୍ରାସ କରିବାକୁ ଚାହୁଁଛନ୍ତି ବୋଲି ସେ କହିଛନ୍ତି।
ଏଥିପାଇଁ ପ୍ରଧାନମନ୍ତ୍ରୀ ସୂର୍ଯ୍ୟ ଘର ଯୋଜନା ଆରମ୍ଭ କରାଯାଉଛି, ଯେଉଁଥିରେ ସୌର ଶକ୍ତି ଦ୍ୱାରା ପ୍ରତ୍ୟେକ ଘରକୁ ସୌର ଗୃହରେ ପରିଣତ କରାଯିବ ବୋଲି ଶ୍ରୀ ମୋଦୀ କହିଛନ୍ତି। ଏହି ପଦକ୍ଷେପ ଲୋକଙ୍କ ବିଦ୍ୟୁତ ଆବଶ୍ୟକତାକୁ ପୂରଣ କରିବ ଏବଂ ସେମାନେ ଅତିରିକ୍ତ ବିଜୁଳି ବିକ୍ରି କରି ନିଜର ଆୟ ବୃଦ୍ଧି କରିବାରେ ସକ୍ଷମ ହେବେ। ଏହାଦ୍ୱାରା ପ୍ରତ୍ୟେକ ପରିବାର ପ୍ରତିବର୍ଷ ହଜାର ହଜାର ଟଙ୍କା ରୋଜଗାର କରିପାରିବେ। ଛତିଶଗଡ଼ରେ ଜାତୀୟ ତାପଜ ଶକ୍ତି ନିଗମର ରାଇଗଡ଼ଠାରେ ବିଦ୍ୟୁତ ପ୍ଲାଣ୍ଟ, ରାଜନାନ୍ଦଗାଓଁ ଜିଲ୍ଲାରେ ପ୍ରାୟ ୪୫୦ ଏକର ପରିମିତ ସୌର ଶକ୍ତି ପ୍ରକଳ୍ପ, ଏସଇସିଏଲର ୩ଟି କୋଇଲା ଭିତ୍ତିକ ପ୍ରକଳ୍ପ, ଗୋଟିଏ ସୌର ଶକ୍ତି ପ୍ଲାଣ୍ଟ, ଗୋଟିଏ ରେଳ ଫ୍ଲାଏଓଭର ଏବଂ ଦୁଇଟି ସଡ଼କ ପ୍ରକଳ୍ପ ସମର୍ପିତ ଓ ଉଦଘାଟିତ ହୋଇଛି।
Comments are closed.