ବୁର୍ଲା: ଆସନ୍ତା ୬ ତାରିଖରେ ହୀରାକୁଦ ନଦୀବନ୍ଧରୁ ଚଳିତବର୍ଷର ପ୍ରଥମ ବନ୍ୟାଜଳ ନିଷ୍କାସନ କରାଯିବ। ମୁଖ୍ୟବନ୍ଧ ବିଭାଗର ଭାରପ୍ରାପ୍ତ ମୁଖ୍ୟଯନ୍ତ୍ରୀ ସୁଶୀଲ ବେହେରା ଗୁରୁବାର ଏ ସମ୍ପର୍କରେ ସୂଚନା ଦେଇଛନ୍ତି।
ଉପର ମୁଣ୍ଡରେ ଗତ କିଛି ଦିନ ହେବ ପ୍ରବଳ ବର୍ଷା ଏବଂ ମୌସୁମୀ ବର୍ଷା ଯୋଗୁଁ ହୀରାକୁଦ ଜଳଭଣ୍ଡାରର ଜଳପତ୍ତନ ବୃଦ୍ଧି ପାଇ ଗୁରୁବାର ୬୦୩.୨୫ ଫୁଟରେ ପହଞ୍ଚିଛି। ହୀରାକୁଦ ଜଳ ଭଣ୍ଡାରକୁ ସନ୍ଧ୍ୟା ୬ଟା ସମୟରେ ହାରାହାରି ୧ ଲକ୍ଷ ୧ ହଜାର ୩୪୯ କ୍ୟୁସେକ ଜଳ ପ୍ରବେଶ କରୁଥିବା ବେଳେ ବରଗଡ଼, ସମ୍ୱଲପୁର ଏବଂ ଶାସନ କେନାଲ, ପାୱାର କେନାଲ ଏବଂ ଶିଳ୍ପ ପାଇଁ ୩୪ ହଜାର ୨୫୪ କ୍ୟୁସେକ ଜଳ ନିଷ୍କାସନ କରାଯାଉଛି। ଗୁରୁବାର ସକାଳ ସୁଦ୍ଧା ପୂର୍ବ ୨୪ ଘଣ୍ଟାରେ ହୀରାକୁଦ ନଦୀବନ୍ଧର ଉପରମୁଣ୍ଡରେ ୩୩.୧୧ ମିଲିମିଟର ଏବଂ ତଳ ମୁଣ୍ଡରେ ୩୭.୫୧ ମିମି ବର୍ଷା ହୋଇଛି।
ଡ୍ୟାମର ଉପର ଓ ତଳ ମୁଣ୍ଡରେ ବର୍ଷା, ଜଳପ୍ରବାହ ଏବଂ ଜଳସ୍ତର ନିରୀକ୍ଷଣ ପାଇଁ ଥିବା ୧୨ଟି ଯାକ ଓୟାରଲେସ ଷ୍ଟେସନକୁ ସକ୍ରିୟ କରାଯାଇଛି। ସାଧାରଣତଃ ହୀରାକୁଦ ଜଳଭଣ୍ଡାରରୁ ଜୁଲାଇ ସମେତ ଅଗଷ୍ଟ ମାସରେ ଉଦବୃତ୍ତ ଜଳ ନିଷ୍କାସନ କରାଯାଇଥାଏ। ହୀରାକୁଦ ନଦୀବନ୍ଧରେ ୩୪ଟି କ୍ରେଷ୍ଟ ଫାଟକ ରହିଥିବା ବେଳେ ୬୪ଟି ସ୍ଲୁଇସ ଫାଟକ ରହିଛି । ଏହା ମାଧ୍ୟମରେ ହୀରାକୁଦ ଜଳଭଣ୍ଡାରରୁ ବନ୍ୟାଜଳ ନିଷ୍କାନ କରାଯାଇଥାଏ । ସୁଚନା ଥାଉକି, ୧୯୮୦ ମସିହାରେ ସର୍ବାଧିକ ୫୫ଟି ସ୍ଲୁଇସ ଓ ୩୦ଟି କ୍ରେଷ୍ଟ ଗେଟକୁ ମିଶାଇ ୮୮ଟି ଫାଟକ ଖୋଲାଯାଇଥିଲା। ଏବେ ବନ୍ଧର ବନ୍ୟାଜଳ ନିୟନ୍ତ୍ରଣ ଓ ଜଳ ନିଷ୍କାସନ କ୍ଷମତାକୁ ୧୫ ଲକ୍ଷ କ୍ୟୁସେକରୁ ୨୪ ଲକ୍ଷ କ୍ୟୁସେକକୁ ବୃଦ୍ଧି କରିବା ପାଇଁ ଅଧିକ ମାତ୍ରାର ସ୍ପିଲୱେ ନିର୍ମାଣ କରାଯିବା ସକାଶେ ପ୍ରକ୍ରିୟା ଆରମ୍ଭ ହୋଇଛି।
