ପ୍ରଥମ ହାଇଡ୍ରୋଜେନ୍ ଟ୍ରେନ୍ ପରୀକ୍ଷଣ ଆରମ୍ଭ କଲା ଭାରତ

ଡେସ୍କ: ଭାରତର ପ୍ରଥମ ହାଇଡ୍ରୋଜେନ୍ ଚାଳିତ ଟ୍ରେନ୍ ହରିୟାଣାର ୮୯ କିଲୋମିଟର ଦୀର୍ଘ ଜିନ୍ଦ-ସୋନିପତ ରୁଟରେ ଆଜି ଏହାର ପରୀକ୍ଷଣ ଆରମ୍ଭ କରିଛି। ଚେନ୍ନାଇର ଇଣ୍ଟିଗ୍ରାଲ୍ କୋଚ୍ ଫ୍ୟାକ୍ଟ୍ରି ଦ୍ୱାରା ନିର୍ମିତ ଏହି ଇକୋ ଫ୍ରେଣ୍ଡଲି ଟ୍ରେନ୍ ସ୍ଥାୟୀ ପରିବହନ ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ। ଘଣ୍ଟାପ୍ରତି ୧୧୦ କିଲୋମିଟର ବେଗରେ ପହଞ୍ଚିବାରେ ସକ୍ଷମ ଏହି ଟ୍ରେନରେ ଗୋଟିଏ ପାସେଞ୍ଜର କୋଚ୍ ଏବଂ ହାଇଡ୍ରୋଜେନ୍ ଷ୍ଟୋରେଜ୍ ପାଇଁ ସମର୍ପିତ ଦୁଇଟି ଅତିରିକ୍ତ କୋଚ୍ ରହିଛି।

ହାଇଡ୍ରୋଜେନ ଟ୍ରେନରେ ୧୨୦୦ ହର୍ସପାୱାର ଇଞ୍ଜିନ ରହିଛି ଏବଂ ଏଥିରେ ଗୋଟିଏ ଥରରେ ୨୬୩୮ ଜଣ ଯାତ୍ରୀ ଯାତ୍ରା କରିପାରିବେ। ଭାରତୀୟ ରେଳବାଇର ସବୁଜ ଶକ୍ତି ଅଭିଯାନର ଏକ ଅଂଶ ଭାବରେ ୩୫ଟି ହାଇଡ୍ରୋଜେନ ଇନ୍ଧନ ସେଲ୍ ଆଧାରିତ ଟ୍ରେନର ବିକାଶ ପାଇଁ ୨,୮୦୦ କୋଟି ଟଙ୍କା ଆବଣ୍ଟନ କରାଯାଇଛି, ଯାହା ଭାରତକୁ ହାଇଡ୍ରୋଜେନ ରେଳ ଜ୍ଞାନକୌଶଳରେ ବିଶ୍ୱର ଅଗ୍ରଣୀ ରାଷ୍ଟ୍ର ମାନଙ୍କ ମଧ୍ୟରେ ସ୍ଥାନିତ କରିଛି। ସଫଳ ପରୀକ୍ଷଣ ପରେ ଭାରତୀୟ ରେଳବାଇ ଏହି ଟ୍ରେନକୁ ନିୟମିତ ସେବାରେ ପରିଣତ କରିବାକୁ ଯୋଜନା କରିଛି। ୨୦୩୦ ସୁଦ୍ଧା କାର୍ବନ ନିର୍ଗମନ ହ୍ରାସ କରିବା ଏବଂ ଶୂନ୍ୟ ନିର୍ଗମନ ହାସଲ ଲକ୍ଷ୍ୟକୁ ଆଗକୁ ବଢ଼ାଇବାରେ ଏହି ପଦକ୍ଷେପ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ବୋଲି ଆଶା କରାଯାଉଛି।

‘ହାଇଡ୍ରୋଜେନ୍ ଫର୍ ହେରିଟେଜ୍’ ପ୍ରକଳ୍ପ ଅଧୀନରେ ଭାରତୀୟ ରେଳବାଇ ଐତିହ୍ୟ ଓ ପାହାଡ଼ିଆ ମାର୍ଗରେ ୩୫ଟି ହାଇଡ୍ରୋଜେନ୍ ଟ୍ରେନ୍ ଚଳାଇବାକୁ ପ୍ରସ୍ତୁତ ହେଉଛି। ଭିତ୍ତିଭୂମି ବିକାଶ, ନିରବଚ୍ଛିନ୍ନ ହାଇଡ୍ରୋଜେନ ଷ୍ଟୋରେଜ୍ ଏବଂ ଇନ୍ଧନ ଯୋଗାଣ କ୍ଷମତା ସୁନିଶ୍ଚିତ କରିବା ପାଇଁ ସରକାର ୬୦୦ କୋଟି ଟଙ୍କାର ବ୍ୟୟବରାଦ କରିଛନ୍ତି। ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ରାଜ୍ୟସଭାରେ କହିଛନ୍ତି ଯେ ଏହି ପ୍ରକଳ୍ପ ବିକଳ୍ପ ଶକ୍ତି ଚାଳିତ ଟ୍ରେନ୍ ଯାତ୍ରାରେ ଅଗ୍ରଗତି ଦିଗରେ ଭାରତୀୟ ରେଳବାଇର ପ୍ରତିବଦ୍ଧତାକୁ ଆହୁରି ପ୍ରତିଷ୍ଠିତ କରିବ, ଯାହା ଦ୍ୱାରା ଦେଶର ପରିବହନ କ୍ଷେତ୍ରପାଇଁ ଏକ ସ୍ୱଚ୍ଛ ଏବଂ ସବୁଜ ଭବିଷ୍ୟତ ସୁନିଶ୍ଚିତ ହେବ।

ହାଇଡ୍ରୋଜେନ୍ ଟ୍ରେନ୍ କେବଳ ପାଣି ଏବଂ ଉତ୍ତାପ ନିର୍ଗତ କରି ବିଜୁଳି ଉତ୍ପାଦନ କରୁଥିବା ଇନ୍ଧନ କୋଷଗୁଡ଼ିକରେ ଚାଲୁଥାଏ, ଯାହା ସେମାନଙ୍କୁ ଡିଜେଲ ଚାଳିତ ଇଞ୍ଜିନର ଏକ ପରିବେଶ ଅନୁକୂଳ ବିକଳ୍ପରେ ପରିଣତ କରିଥାଏ। ପ୍ରତ୍ୟେକ ଟ୍ରେନ୍ ପାଇଁ ୮୦ କୋଟି ଟଙ୍କା ଖର୍ଚ୍ଚ ହେବ ବୋଲି ଆକଳନ କରାଯାଇଛି ଏବଂ ସମ୍ପୂର୍ଣ୍ଣ କାର୍ଯ୍ୟକ୍ଷମ ହେବା ପରେ ଭାରତ ହାଇଡ୍ରୋଜେନ୍ ରେଳ ଜ୍ଞାନକୌଶଳ ଗ୍ରହଣ କରିଥିବା ଜର୍ମାନ, ଚୀନ୍ ଏବଂ ବ୍ରିଟେନ୍ ଭଳି ଦେଶ ତାଲିକାରେ ସାମିଲ ହେବ।

ହାଇଡ୍ରୋଜେନ ଟ୍ରେନର ମୁଖ୍ୟ ଉପକାରିତା ହେଉଛି…
୧. ଶୂନ୍ୟ ଅଙ୍ଗାରକ ନିର୍ଗମନ: ଏହି ଟ୍ରେନଗୁଡିକ କେବଳ ଜଳୀୟ ବାଷ୍ପ ନିର୍ଗତ କରେ, ଯାହା ପ୍ରଦୂଷଣକୁ ଯଥେଷ୍ଟ ହ୍ରାସ କରିଥାଏ।
୨. ଶକ୍ତି ଦକ୍ଷତା: ହାଇଡ୍ରୋଜେନ୍ ଇନ୍ଧନ କୋଷ ଜୀବାଶ୍ମ ଇନ୍ଧନର ଅଧିକ ଶକ୍ତି-ଦକ୍ଷ ବିକଳ୍ପ ପ୍ରଦାନ କରେ।
୩. ଦୀର୍ଘମିଆଦୀ ଖର୍ଚ୍ଚ-ଫଳପ୍ରଦତା: ପ୍ରାରମ୍ଭିକ ନିବେଶ ଅଧିକ ଥିଲେ ମଧ୍ୟ ଇନ୍ଧନ ସଞ୍ଚୟ ଏବଂ ପରିବେଶ ଗତ ଲାଭ ହାଇଡ୍ରୋଜେନ ଟ୍ରେନକୁ ଏକ ଉପଯୋଗୀ ଦୀର୍ଘମିଆଦୀ ବିକଳ୍ପରେ ପରିଣତ କରିଥାଏ।
୪. ଶବ୍ଦ ପ୍ରଦୂଷଣ ହ୍ରାସ: ହାଇଡ୍ରୋଜେନ ଟ୍ରେନର ଶାନ୍ତ ଚଳାଚଳ ଯାତ୍ରୀଙ୍କ ଆରାମକୁ ବଢ଼ାଇଥାଏ।

ହାଇଡ୍ରୋଜେନ୍ ଟ୍ରେନ୍ ଚଳାଚଳକୁ ସମର୍ଥନ କରିବା ପାଇଁ ଭାରତୀୟ ରେଳବାଇ ସମନ୍ବିତ ହାଇଡ୍ରୋଜେନ୍ ଉତ୍ପାଦନ, ଷ୍ଟୋରେଜ୍ ଏବଂ ଇନ୍ଧନ ଭର୍ତ୍ତି ସୁବିଧା ସ୍ଥାପନ କରିବାକୁ ଯୋଜନା କରିଛି। ପେଟ୍ରୋଲିୟମ ଏବଂ ବିସ୍ଫୋରକ ନିରାପତ୍ତା ସଂଗଠନଠାରୁ ଆବଶ୍ୟକ ସୁରକ୍ଷା ଅନୁମୋଦନ ମିଳିଛି ବୋଲି ରେଳମନ୍ତ୍ରୀ ନିଶ୍ଚିତ କରିଛନ୍ତି।