ମସ୍କୋର ଏକ ସପିଙ୍ଗ୍ ମଲ୍ରେ ଭୟାବହ ଅଗ୍ନିକାଣ୍ଡ; ଜୀବନ ବଞ୍ଚାଇବାକୁ ଝରକା କାଚ ଭାଙ୍ଗି ଡେଇଁଲେ ଲୋକେ
ମସ୍କୋ: ପଶ୍ଚିମ ସାଇବେରିଆର ଏକ ସପିଙ୍ଗ୍ ମଲ୍ରେ ଭୟାବହ ଅଗ୍ନିକାଣ୍ଡ ଘଟିଛି । ପ୍ରାୟ ୬୦୦ ଲୋକ ସପିଙ୍ଗ୍ ମଲରେ ଫସି ରହିଥିବା ଅନୁମାନ କରାଯାଉଛି । ସେମାନଙ୍କ ଉଦ୍ଧାର କାର୍ଯ୍ୟରେ ୬୨ଟି ଦମକଳ ନିୟୋଜିତ ହୋଇଛି । ଅଗ୍ନିକାଣ୍ଡରେ ମୃତଙ୍କ ସଠିକ ସଂଖ୍ୟା ଜଣାପଡି ନଥିବା ବେଳେ ଏଯାବତ୍ ୩୭ ଜଣଙ୍କ ମୃତଦେହ ଉଦ୍ଧାର ହୋଇଥିବା ନେଇ ଉଦ୍ଧାରକାରୀ ଦଳ ପକ୍ଷରୁ ସୂଚନା ମିଳିଛି । ଜୀବନ ବଞ୍ଚାଇବାକୁ ଯାଇ ନିଆଁରେ ଫସିଥିବା ଲୋକମାନେ ଝରକା କାଚ ଭାଙ୍ଗି ଡେଇଁବାକୁ ଉଦ୍ୟମ କରିଥିଲେ ।
ସୂଚନାଯୋଗ୍ୟ, ଗତକାଲି ରାତି ଭାରତୀୟ ସମୟ ଅନୁସାରେ ପ୍ରାୟ ସାଢେ ୨ଟା ବେଳେ ପ୍ରଥମେ ଗୋଟାଏ ସିନେମା ହଲ୍ରେ ନିଆଁ ଲାଗି ଓ ପରେ ସପିଙ୍ଗ ମଲରେ ଥିବା ସବୁ ଦୋକାନକୁ ବ୍ୟାପି ଯାଇଥିଲା। ଜ୍ୱଳନ୍ତ ସପିଙ୍ଗ୍ ମଲ ମଧ୍ୟରୁ ପ୍ରାୟ ୧୨୦ ଜଣଙ୍କୁ ଉଦ୍ଧାର କରାଯାଇଛି ବୋଲି ଉଦ୍ଧାରକାରୀ ଦଳ ପକ୍ଷରୁ କୁହାଯାଇଛି । ଏପର୍ଯ୍ୟନ୍ତ ୬୪ ଜଣ ଲୋକ ନିଖୋଜ ଅଛନ୍ତି ଏବଂ ସେମାନଙ୍କ ମଧ୍ୟରେ ୪୧ ଜଣ ପିଲା ଥିବା ଜଣାପଡିଛି । ଏହି ମଲଟି ୨୦୧୩ ମସିହାରେ ଖୋଲା ଯାଇଥିଲା ।