ରାୟଗଡା : ରାୟଗଡା ଜିଲା କାଶୀପୁର ବ୍ଲକର ଟିକିରିରେ ଦୁଇଟି ଫାଇନାନ୍ସ କମ୍ପାନୀର କର୍ମଚାରୀଙ୍କ ୧୨ଟି ମୋଟରସାଇକେଲ ଜାଳି ଦେଲେ ଦୁର୍ବୃତ୍ତ। ଟିକିରିସ୍ଥିତ ପତି କମ୍ପ୍ଲେକ୍ସ ନିକଟରେ ଥିବା ଫ୍ୟୁଜନ ଫାଇନାନ୍ସ ଓ ସ୍ପନ୍ଦନା ଘରୋଇ ଫାଇନାନ୍ସ କମ୍ପାନୀ କର୍ମଚାରୀଙ୍କ ବାଇକ ପୋଡି ଦେଇଛନ୍ତି ଦୁର୍ବୁତ୍ତ । ଗତକାଲି ମଧ୍ୟରାତ୍ରି ସାଢେ ୨ଟା ବେଳେ କାର୍ଯ୍ୟାଳୟ ପରିସରରେ ରଖାଯାଇଥିବା ୧୨ଟି ବାଇକକୁ କେହି ଦୁର୍ବୁତ୍ତ ନିଆଁ ଲଗାଇ ଦେବା ସହ କର୍ମଚାରୀମାନେ ରହୁଥିବା ତଳ ମହଲା ଘରର ମୁଖ୍ୟ କବାଟ ବାହାର ପଟୁ ବନ୍ଦ କରି ଦେଇଥିଲେ । ବୁଧବାର ରାତି ସାଢେ ୨ଟା ବେଳେ ଉପର ମହଲାରେ ରହୁଥିବା ଫ୍ୟୁଜନ ଫାଇନାନ୍ସ କମ୍ପାନୀର କର୍ମଚାରୀ ମନୁ ନାୟକ ନିଦରୁ ଉଠି ଦେଖିଲା ବେଳକୁ ଘର ବାହାରେ ନିଆଁ ଲାଗିଛି । ଏ ନେଇ ଅନ୍ୟ କର୍ମଚାରୀମାନଙ୍କୁ ଜଣାଇଥିଲେ । ତାପରେ ସମସ୍ତେ କବାଟ ଖୋଲି ପଦାକୁ ଆସିବାକୁ ଚେଷ୍ଟା କରିଥିଲେ । ହେଲେ କବାଟ ବାହାର ପଟୁ ବନ୍ଦ ଥିବାରୁ ବାହାରକୁ ବାହାରି ପାରିନଥିଲେ । ମୁହଁରେ ଗାମୁଛା ବାନ୍ଧି ବହୁକଷ୍ଟରେ ସେମାନେ ଛାତ ଉପରକୁ ଉଠିଥିଲେ । ଦେଖିଲା ବେଳକୁ ତଳେ ହୁତୁ ହୁତୁ ହୋଇ ବାଇକ ସବୁ ଜଳୁଛି । ଏହି ସମୟରେ ତଳ ଘରେ ଶୋଇଥିବା ସ୍ପନ୍ଦନ ଫାଇନାନ୍ସ କମ୍ପାନୀର ୫ କର୍ମଚାରୀ ନିଆଁ ଓ ଧୂଆଁ ଧାସରେ ଅଣନିଶ୍ୱସୀ ହୋଇ ଚିତ୍କାର କରୁଥିଲେ । ସଙ୍ଗେ ସଙ୍ଗେ ତଳକୁ ଆସି ସ୍ପନ୍ଦନ କମ୍ପାନୀର ୫ କର୍ମଚାରୀଙ୍କୁ କବାଟ ଖୋଲି ସମସ୍ତଙ୍କୁ ଉଦ୍ଧାର କରିଥିଲେ । ଫଳରେ ଏକ ବଡ଼ ଅଘଟଣରୁ ବର୍ତ୍ତି ଯାଇଛନ୍ତି ୫ ଜଣ କର୍ମଚାରୀ । ଏ ସଂପର୍କରେ ଖବର ପାଇ ଉତ୍କଳ ଆଲୁମିନା ଓ କାଶିପୁର ଅଗ୍ନିଶମ ବାହିନୀ ଘଟଣାସ୍ଥଳରେ ପହଂଚି ନିଆଁକୁ ଆୟତ୍ତ କରିଥିଲା । ଘଟଣା ସମ୍ପର୍କରେ ସ୍ପନ୍ଦନ ଫାଇନାନ୍ସ ବ୍ରାଞ୍ଚ ମ୍ୟାନେଜର ବିକ୍ରମ ପୁରୋହିତ ଟିକିରି ଥାନାରେ ଅଭିଯୋଗ କରିଛନ୍ତି । ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ନିକଟରେ ଥିବା ସିସିଟିଭି ଫୁଟେଜକୁ ନେଇ ପୂଲିସ ଅନୁସନ୍ଧାନ ଚଳାଇଛି ।
Comments are closed.