ମୁଙ୍ଗେଲୀ : ଛତିଶଗଡର ମୁଙ୍ଗେଲୀ ଜିଲାର ଘୋରପୁରା ଗାଁରେ ଏକ ନିଆରା ଢଙ୍ଗରେ ବିବାହ ଦେଖିବାକୁ ମିଳିଛି । ଜଣେ ଚାଷୀ ପୁଅ ବିବାହ ପାଇଁ ହେଲିକପ୍ଟରରେ ପହଞ୍ଚିଛି । ଏହି ଖବର ଶୁଣିବା ପରେ ବରକୁ ଦେଖିବା ପାଇଁ ଭିଡ ଜମିଥିଲା । ଏହାକୁ ନେଇ ମୁଙ୍ଗେଲୀ ଜିଲାବାସୀଙ୍କ ମଧ୍ୟରେ ଉତ୍ସାହ ଭରି ରହିଛି । ଏହି ଶୁଭ ମୁହୂର୍ତ୍ତ ଅବସରରେ ବର ଓ ତାଙ୍କ ପରିବାରଲୋକଙ୍କ ମଧ୍ୟରେ ଅସୁମାରୀ ଖୁସୀ ଦେଖିବାକୁ ମିଳିଛି ।
ଘୋରପୁରା ବାସିନ୍ଦା ଅଙ୍କୁଶଙ୍କ ସତନା ଜିଲାର ଆଦର୍ଶିତା ସିଂହ ନାମକ ଯୁବତୀଙ୍କ ସହ ବିବାହ ସ୍ଥିର ହୋଇଥିଲା। ଅଙ୍କୁଶ ଙ୍କ ଜେଜେ ବାପା ଧର୍ମରାଜ ସିଂହଙ୍କ ଇଚ୍ଛା ଥିଲା ଯେ, ତାଙ୍କ ନାତି ବର ବେଶରେ ଘୋଡିରେ ନଚଢି ହେଲିକପ୍ଟରେ ବିବାହ ମଣ୍ଡପରେ ପହଞ୍ଚନ୍ତୁ । ଅଙ୍କୁଶ ଜେଜେବାପାଙ୍କ ଇଚ୍ଛା ପୁରା କରିବାକୁ ଯାଇ ହେଲିକପ୍ଟରରେ କନ୍ୟାଘର ଗ୍ରାମରେ ପହଞ୍ଚିଥିଲେ । ସେଠାରେ ବିବାହ ସାରି ବଧୂ ଆଦର୍ଶିତ ସିଂହଙ୍କୁ ଧରି ପୁଣି ହେଲିକପ୍ଟରେ ଯୋଗେ ମୁଙ୍ଗେଲୀ ଫେରିଥିଲେ ।
ନେତା, ରାଜନେତା ଏବଂ ଧନୀ ଶ୍ରେଣୀର ଲୋକ ପାଇଁ ହେଲିକପ୍ଟରେ ଉଡିବା କିଛି ବଡ ନୁହେଁ । କିନ୍ତୁ ଜଣେ ଚାଷୀ ପୁଅ ହେଲିକପ୍ଟର ଚଢି ବିବାହ ମଣ୍ଡପରେ ପହଞ୍ଚିବା ସ୍ଥାନୀୟ ଅଞ୍ଚଳର ଚର୍ଚ୍ଚାର ବିଷୟ ପାଲଟିଛି । ହାଇଦ୍ରାବାଦରୁ ଏହି ହେଲିକପ୍ଟର ଭଡାରେ ନେଇଥିଲେ ବୋଲି ଅଙ୍କୁଶ କହିଛନ୍ତି । ହେଲିକପ୍ଟର ଉଡାଣ ଓ ଅବତରଣ ପାଇଁ ସେ ଜିଲା ପ୍ରଶାସନରୁ ଅନୁମତି ନେଇଥିଲେ । ଏହା ଘଟଣା ତାଙ୍କ ଗ୍ରାମରେ ପ୍ରଥମ ବୋଲି ଅଙ୍କୁଶ କହିଛନ୍ତି ।
