ପାଟଣା : ସାହାରପଡା ବ୍ଲକ ଶିକ୍ଷାଧିକାରୀ ଉତ୍ତମ କୁମାର ନାୟକଙ୍କ ଫେସବୁକ ହ୍ୟାକ କରି କେହି ଜଣେ ଅଜଣା ଠକ ତାଙ୍କ ନାମରେ ବିଭିନ୍ନ ଲୋକଙ୍କୁ ଗତ କାଲି ଟଙ୍କା ମାଗୁଥିଲା। ଏପରିକି ଠକର ଅନୁରୋଧକୁ ବ୍ଲକ ଶିକ୍ଷାଧିକାରୀଙ୍କ ଅନୁରୋଧ ଭାବି ଘସିପୁରା ଅଞ୍ଚଳର ଜଣେ ଶିକ୍ଷକ ପ୍ରଥମେ ୧୫ ହଜାର ଟଙ୍କା ଓ ପରେ ୩ ହଜାର ଟଙ୍କା ମଧ୍ୟ ତାକୁ ଅନଲାଇନରେ ଦେଇ ଦେବା ସହ ଟଙ୍କା ପଠାଇଛି ବୋଲି ମଧ୍ୟ ବ୍ଲକ ଶିକ୍ଷାଧିକାରୀଙ୍କୁ ଫୋନ ଯୋଗେ ଜଣାଇବାରୁ ନାୟକ ତାଙ୍କ ଫେସବୁକ ହ୍ୟାକ ହୋଇଥିବା ଜାଣିବାକୁ ପାଇଥିଲେ। ଏହାପରେ ସେ ନିଜ ଫେସବୁକ ଜରିଆରେ କେହି ଠକାମୀର ଶିକାର ନହେବାକୁ ସୂଚନା ଦେଇଥିଲେ । କିଛି ଦିନ ତଳେ ଏହି ଭଳି ଜଣେ ଠକ ଘଟଗାଁ ତାରିଣୀ ଠାକୁରାଣୀ ମହାବିଦ୍ୟାଳୟର ଅବସରପ୍ରାପ୍ତ ଅଧ୍ୟକ୍ଷ ଜଗନ୍ନାଥ ଦାଶଙ୍କ ଫେସବୁକକୁ ହ୍ୟାକ କରି ଅନୁରୂପ ଢଙ୍ଗରେ ସାହାଯ୍ୟ ମାଗିଥିଲା । ଦାଶ ମଧ୍ୟ ନିଜ ଫେସବୁକରେ ଏହି ଠକେଇରେ ଶିକାର ନହେବା ପାଇଁ ସୂଚନା ଦେଇଥିଲେ ।
