ଲାଞ୍ଜିଗଡ଼: କଂଗ୍ରେସର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଛନ୍ତି ଲାଞ୍ଜିଗଡ଼ର ପୂର୍ବତନ ବିଧାୟକ ଶିବାଜୀ ମାଝୀ। ପିସିସି ସଭାପତି ନିରଞ୍ଜନ ପଟ୍ଟନାୟକ ଓ ଜିଲା ସଭାପତିଙ୍କୁ ନିଜର ବ୍ୟକ୍ତିଗତ କାରଣ ଦର୍ଶାଇ ମେଲ ମାଧ୍ୟମରେ ଇସ୍ତଫା ପତ୍ର ପଠାଇଛନ୍ତି। ୨୦୦୭ ମସିହାରେ ସେ କଂଗ୍ରେସରେ ଯୋଗ ଦେଇଥିଲେ। ଶିବାଜୀ ମାଝୀ ୨୦୦୯ରୁ ୨୦୧୪ ପର୍ଯ୍ୟନ୍ତ ସେ କଂଗ୍ରେସ ଦଳରୁ ବିଧାୟକ ହୋଇ ବିଧାନସଭାକୁ ଯାଇଥଲେ। ଏହାପରେ ୨୦୧୯ ନିର୍ବାଚନରେ କଂଗ୍ରେସ ଟିକଟରେ ପ୍ରତିଦ୍ବନ୍ଦ୍ବୀତା କରିଥିଲେ ଏବଂ ପରାଜୟ ହୋଇଥିଲେ। ସେହିଦିନ ଠାରୁ ତାଙ୍କୁ ଦଳରେ ଗୁରୁତ୍ବ ଦିଆଗଲା ନାହିଁ। କୋଣସି ଦଳୀୟ କାର୍ଯ୍ୟକ୍ରମରେ ଡକାଗଲା ନାହିଁ। ତେଣୁ ସେ କଂଗ୍ରେସର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଥିବା ସୂଚନା ମିଳିଛି।
ଏଠାରେ ସୂଚନା ଯୋଗ୍ୟ ଯେ ଶ୍ରୀ ମାଝୀ ୨୦୦୭ ମସିହାରେ କଂଗ୍ରେସରେ ଯୋଗ ଦେଇଥିଲେ। କଂଗ୍ରେସ ଟିକେଟରେ ୨୦୧୪ ମସିହାରେ ସେ ଲାଞ୍ଜିଗଡ଼ ନିର୍ବାଚନ ମଣ୍ଡଳୀରୁ ଲଢ଼ି ନିର୍ବାଚିତ ହୋଇ ବିଧାୟକ ବନିଥିଲେ। ବିଧାୟକ ହେବା ପରେ ସେ ପରବର୍ତ୍ତୀ ନିର୍ବାଚନରେ ପରାଜୟ ବରଣ କରିଥିଲେ। ତେବେ ଏହି ସମୟ ଭିତରେ ତାଙ୍କର ଦଳବଦଳ ହେବା ନେଇ ବଡ଼ ଚର୍ଚ୍ଚା ହେଉଥିଲେ ମଧ୍ୟ ସେ କୌଣସି ଦଳରେ ଯୋଗ ଦେଉନଥିଲେ। କିନ୍ତୁ ଆଜି ସେ ହଠାତ ଦଳ ଛାଡିଛନ୍ତି। ତେବେ ମୁଖ୍ୟମନ୍ତ୍ରୀଙ୍କ କଳାହାଣ୍ଡି ଗସ୍ତର ଅବ୍ୟବହିତ ପୂର୍ବରୁ ତାଙ୍କର ଇସ୍ତଫା ଦେବା ପ୍ରସଙ୍ଗ ସେ ବିଜେଡିରେ ଯୋଗଦେବା ନେଇ ଆଲୋଚନା ଜୋର ଧରିଛି।
