ସମାଜ ଡିଜିଟାଲ ଡେସ୍କ: ୨୦୦୮ ମାଲେଗାଓଁ ବିସ୍ଫୋରଣ ମାମଲାରେ ଆରଏସଏସ(ରାଷ୍ଟ୍ରୀୟ ସ୍ଵୟଂସେବକ ସଂଘ) ମୁଖ୍ୟ ମୋହନ ଭାଗବତଙ୍କୁ ଗିରଫ କରିବାକୁ ନିର୍ଦେଶ ରହିଥିଲା। ଏହାର ଖୁଲାସା କରିଛନ୍ତି ମାମଲାର ତଦନ୍ତ କରୁଥିବା ମହାରାଷ୍ଟ୍ର ଆତଙ୍କବାଦ ନିରୋଧୀ ସ୍କ୍ଵାଡ୍(ଏଟିଏସ)ର ପୂର୍ବତନ ଅଧିକାରୀ ମେହିବୁବ ମୁଜାଓ୍ବର। ଏପରି କି ସେ ଉକ୍ତ ଆଦେଶ ପାଳନ ନ କରିବାରୁ ତାଙ୍କ ବିରୋଧରେ ମିଥ୍ୟା ମାମଲା ରୁଜୁ କରି ତାଙ୍କ ୪୦ ବର୍ଷର କ୍ୟାରିୟରକୁ ବରବାଦ କରିଦିଆଯାଇଥିଲା ବୋଲି କହିଛନ୍ତି।
ମୁଜାଓ୍ବର ଏକ ଜାତୀୟ ଗଣମାଧ୍ୟମକୁ ସାକ୍ଷାତକାର ଦେବା ସମୟରେ କହିଛନ୍ତି ଯେ, ମାମଲାର ତଦନ୍ତ ଚାଲିଥିବା ସମୟରେ ଭାଗବତଙ୍କୁ ଗିରଫ କରିବାକୁ ତାଙ୍କୁ ଉପରୁ ନିର୍ଦେଶ ଦିଆଯାଇଥିଲା। ଏହି ଘଟଣା ପଛରେ ‘ଗେରୁଆ ଆତଙ୍କବାଦ’ର ସମ୍ପୃକ୍ତି ରହିଥିବା ପ୍ରମାଣିତ କରିବା ଏଭଳି ନିର୍ଦେଶର ଉଦ୍ଦେଶ୍ୟ ଥିଲା। କିନ୍ତୁ ଏସବୁ ନିର୍ଦେଶକୁ ପାଳନ କରିବା ସମ୍ଭବ ନ ଥିଲା। ସେ ବାସ୍ତବତା ଜାଣିଥିଲେ। ତେଣୁ ଭାଗବତଙ୍କ ଭଳି ଜଣେ ପ୍ରତିଷ୍ଠିତ ବ୍ୟକ୍ତିତ୍ଵଙ୍କୁ ଗିରଫ କରିବା ତାଙ୍କ ଦକ୍ଷତା ବାହାରେ ଥିଲା ବୋଲି ମୁଜାଓ୍ବର କହିଛନ୍ତି।
