ରେଙ୍ଗାଲିକ୍ୟାମ୍ପ : ଏକ ସୁସ୍ଥ ସମାଜ ଗଠନରେ ‘ଶିକ୍ଷା’ର ଗୁରୁତ୍ବପୂର୍ଣ୍ଣ ଭୂମିକା ରହିଛି। ବିଗତ ପ୍ରାୟ ଦେଢ଼ ବର୍ଷ ହେଲା କରୋନା ମହାମାରୀର ସଂକ୍ରମଣକୁ ଦୃଷ୍ଟିରେ ରଖି ବିଦ୍ୟାଳୟଗୁଡ଼ିକ ବନ୍ଦ ରହିଛି। ଫଳରେ କୁନି କୁନି ଭବିଷ୍ୟତ ଶିକ୍ଷା ରୂପକ ଆଲୋକରୁ ଦୂରେଇ ଯାଇଛନ୍ତି । ସରକାରଙ୍କ ଅନେକ ପ୍ରୟାସ ସତ୍ତ୍ୱେ ଆଜି ପର୍ଯ୍ୟନ୍ତ ଶତ ପ୍ରତିଶତ ପିଲା ଶିକ୍ଷା ବ୍ୟବସ୍ଥାର ଲାଭ ନେଇ ପାରୁନାହାନ୍ତି। ତେଣୁ ଏହି ସମସ୍ୟାର ସମାଧାନ ପାଇଁ ଶନିବାର ଅତାବିରା ଶିକ୍ଷକ ଭବନଠାରେ ଅତାବିରା ତଥା ଭେଡେନ ବ୍ଲକ ଶିକ୍ଷା ଅଧିକାରୀଙ୍କ ଅଧ୍ୟକ୍ଷତାରେ ପ୍ରାଥମିକ ଶିକ୍ଷାକୁ ନିରନ୍ତର କରିବା ପାଇଁ ‘ନିରନ୍ତର ଶିକ୍ଷଣ କାର୍ଯ୍ୟକ୍ରମ’ ଅନୁଷ୍ଠିତ ହୋଇଯାଇଛି।
ଏହି କାର୍ୟ୍ୟକ୍ରମରେ ବରଗଡ଼ ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ ରାଧାକାନ୍ତ ଛତ୍ରି ମୁଖ୍ୟ ଅତିଥି ରୂପେ ଯୋଗ ଦେଇଥିବା ବେଳେ ଅଧ୍ୟକ୍ଷ ଜିଲ୍ଲା ଶିକ୍ଷା ପ୍ରତିଷ୍ଠାନ ଅକ୍ଷୟ କୁମାର ବାରିକ୍, ଅତିରିକ୍ତ ବ୍ଲକ ଶିକ୍ଷା ଅଧିକାରୀ କାର୍ତ୍ତିକ ବାଗ, ଜିଲ୍ଲା ଶିକ୍ଷା ପ୍ରତିଷ୍ଠାନର ବରିଷ୍ଠ ଶିକ୍ଷକ ପ୍ରଶିକ୍ଷିକା ସୀମାଞ୍ଜଳି ସାହୁ ସମ୍ମାନିତ ଅତିଥି ରୂପେ ଯୋଗ ଦେଇଥିଲେ। ସିଂହପାଲି କ୍ଲଷ୍ଟରର ସିଆରସିସି ମନୋରଞ୍ଜନ ମିଶ୍ର ଅତିଥି ପରିଚୟ ପ୍ରଦାନ ପୂର୍ବକ ସ୍ଵାଗତ ଅଭିଭାଷଣ ଦେଇଥିଲେ। ବରଗଡ଼ ଜିଲ୍ଲା ଶିକ୍ଷା ଅଧିକାରୀ ଓ ଜିଲ୍ଲା ଶିକ୍ଷା ପ୍ରତିଷ୍ଠାନର ପ୍ରୟାସ କ୍ରମେ ଆରମ୍ଭ ହୋଇଥିବା ନିରନ୍ତର ଶିକ୍ଷଣ କର୍ମଶାଳାର ଆଭିମୁଖ୍ୟ ପ୍ରଦାନ କରି ଶ୍ରୀ ବାରିକ ଉପସ୍ଥିତ ଶିକ୍ଷକ ଶିକ୍ଷୟିତ୍ରୀ ମାନଙ୍କୁ ପିଲାମାନଙ୍କୁ ନିରନ୍ତର ଶିକ୍ଷା ଦାନ କରିବାରେ ସକ୍ରିୟ ଭୂମିକା ଗ୍ରହଣ କରିବା ପାଇଁ ଆହ୍ବାନ ଦେଇଥିଲେ। ପ୍ରାଥମିକ ଶିକ୍ଷାରେ ନିରନ୍ତର ଶିକ୍ଷାର ଆବଶ୍ୟକତା,ଉପାଦେୟତା ଓ ଉପରେ ବିଶଦ ଆଲୋଚନା କରି ଏହାକୁ ସଫଳ କରିବାରେ ଶିକ୍ଷକ ଶିକ୍ଷୟିତ୍ରୀ ମାନଙ୍କ ସକ୍ରିୟ ଯୋଗଦାନ ଆବଶ୍ୟକ ବୋଲି ଶିକ୍ଷକ ପ୍ରଶୀକ୍ଷିକା କହିଥିଲେ। ପରିଶେଷରେ ଶ୍ରୀ ବାଗ କାର୍ୟ୍ୟକ୍ରମର ସଫଳତା କାମନା କରିଥିଲେ। ଏହି କାର୍ଯ୍ୟ ଶାଳାରେ ବ୍ଲକର ସମସ୍ତ କେନ୍ଦ୍ର ସାଧନ ସଂଯୋଜକ ପଞ୍ଚାନନ ନାଥ, ସୁରେନ୍ଦ୍ର ଭୋଷାଗର, କିଚକ ସୁନା, ବାଲେଶ୍ଵର ବାଗ, କଂସମନି ଶତପଥୀ, ଭକ୍ତ କହ୍ନେଇ, ମୁନି ଭୋସାଗର, କିଶୋର ଚନ୍ଦ୍ର ପ୍ରଧାନ, ଜୟଦେବ ନାୟକ, ଋଷୁଭ ପଣ୍ଡା, ଅକ୍ଷୟ ତ୍ରିପାଠୀ, କେନ୍ଦ୍ର ପ୍ରଧାନ ଶିକ୍ଷକ ରବୀନ୍ଦ୍ର ପୁଝାରୀ, ପ୍ରମୋଦ ମେହେର, ଲୋକନାଥ ମହାନନ୍ଦ, ଲକ୍ଷ୍ମଣ ଭୋଇ, ଗୋକୁଳାନନ୍ଦ ମଲ୍ଲିକ, ବଳରାମ ମେହେର ପ୍ରମୁଖ ଯୋଗ ଦେଇଥିବା ବେଳେ ବିରେନ୍ଦ୍ର କୁମାର ଭୋଇ ଧନ୍ୟବାଦ ଅର୍ପଣ କରିଥିଲେ।
