କୋଲକତା: ପଶ୍ଚିମବଙ୍ଗର ରାସନ ଘୋଟାଲା ମାମଲାରେ ପୁଣି କାର୍ଯ୍ୟାନୁଷ୍ଠାନ ଆରମ୍ଭ କରିଛି ଇଡ଼ି । ବୁଧବାର ସକାଳେ ପଳାତକ ଟିଏମସି ନେତା ଶାହାଜାହାନ ଶେଖଙ୍କ ଘରେ ଚଢାଉ କରିବାକୁ ଇଡି ଟିମ୍ ପଂହଚିଛନ୍ତି । ସୂଚନା ଅନୁସାରେ ଇଡିର ଟିମ ଶାହାଜାହାନଙ୍କ ପରଗାନାର ସାଣ୍ଡେଶଖାଲିରେ ଥିବା ଘରେ ତାଲା ଭାଙ୍ଗି ପ୍ରବେଶ କରିଛନ୍ତି । ଇଡି ଟିମ ସହିତ ସେଣ୍ଟ୍ରାଲ ଫୋର୍ସ ଦଳ ମଧ୍ୟ ଉପସ୍ଥିତ ଅଛନ୍ତି । ଶାହାଜାହାନଙ୍କ ଘର ରାସ୍ତାରେ କେନ୍ଦ୍ରୀୟ ବାହିନୀ ମୁତୟନ କରାଯାଇଛି । ଇଡି ଦଳ ସହିତ ପ୍ରାୟ ୧୦୦ଜଣ ପୁଲିସ କର୍ମଚାରୀ ବାସଭବନକୁ ଘେରି ରହିଛନ୍ତି ।
ରାସନ ସ୍କାମ ମାମଲାରେ ପୂର୍ବରୁ ମଧ୍ୟ ଇଡ଼ି ଟିମ ଶାହାଜାହାନଙ୍କ ଘରେ ଚଢାଉ କରିଥିଲେ । ଯେଉଁଠାରେ ଟିଏମସି ନେତାଙ୍କ ସମର୍ଥକମାନେ ଇଡ଼ି ଦଳ ଉପରେ ଆକ୍ରମଣ କରିଥିଲେ । ଇଡ଼ି ଟିମ ଶାହାଜାହାନଙ୍କ ଘରେ ପହଂଚିବା ପରେ ସ୍ଥାନୀୟ ପୁଲିସ ମଧ୍ୟ ସେମାନଙ୍କୁ ଧମକ ଦେଇ ଇଡ଼ି ଦଳକୁ ସର୍ଚ୍ଚ ୱାରେଣ୍ଟ ମାଗିଥିଲା । ତେବେ ଏଥିରୁ ସ୍ପଷ୍ଟ ହେଉଛି ଯେ ସ୍ଥାନୀୟ ପୁଲିସ ଚାହୁଁଥିଲା ଯେ ସବୁ ଅନୁଧ୍ୟାନକୁ ରାଜ୍ୟ ପୁଲିସ ଭିଡ଼ିଓଗ୍ରାଫି କରୁ । ଯାହାକୁ ଇଡ଼ି ପ୍ରତ୍ୟାଖ୍ୟାନ କରିଛି । ଚଢାଉ ବେଳେ ଦୁଇ ଜଣ ସାକ୍ଷୀ ରହିବେ, ଯେଉଁମାନେ କି ପୁଲିସ ଅଧିକାରୀଙ୍କ ମଧ୍ୟରୁ ହୋଇଥିବେ ବୋଲି ଇଡି ପକ୍ଷରୁ କୁହାଯାଇଛି । ଶାହାଜାହାନଙ୍କ ବାସଭବନରେ ପହଂଚିବା ପୂର୍ବରୁ ଇଡ଼ି ସ୍ଥାନୀୟ ପୁଲିସକୁ ସୂଚନା ଦେଇଥିଲା ।
Comments are closed.