ନୂଆଦିଲ୍ଲୀ : କାଇନାଟିକ୍ ଗ୍ରୀନ୍ ଆଜି ଇ-ଲୁନାର ବଜାର ପ୍ରବେଶ କରିଛି । କମ୍ପାନୀ ଏହି ଇଲେକ୍ଟ୍ରିକ୍ ମୋପେଡକୁ ଅନଲାଇନ୍ ଇ-କମର୍ସ ପ୍ଲାଟଫର୍ମ ଆମାଜନ୍ ଏବଂ ଫ୍ଲିପକାର୍ଟରୁ ମଧ୍ୟ ବିକ୍ରି କରିବ । କମ୍ପାନୀ ଏହାର ବୁକିଂ ୨୬ ଜାନୁୟାରୀ ୨୦୨୪ରୁ ଆରମ୍ଭ କରିଦେଇଥିଲା । ଏହାକୁ ୫୦୦ ଟଙ୍କାର ଟୋକନ ଆମାଉଣ୍ଟ ସହିତ ବୁକ୍ କରିଥିଲେ ଗ୍ରାହକ । ତେବେ ଲୁନାର ଦାମ୍ ୭୧,୯୯୦ ଟଙ୍କା ରଖାଯାଇଛି ।
ଇ-କମର୍ସ ପ୍ଲାଟଫର୍ମରେ ଦିଆଯାଇଥିବା ସୂଚନା ଅନୁସାରେ ଏହାକୁ ଓସନ ବ୍ଲୁ ରଙ୍ଗରେ କିଣିପାରିବେ ଗ୍ରାହକ । କମ୍ପାନୀ ଏଥିରେ ୨ kWhର ଲିଥିୟମ୍ ଆୟନ ବ୍ୟାଟେରୀ ପ୍ୟାକ୍ ଦେଇଛି । ଏଥିରେ ୨ ଓ୍ବାଟର ମୋଟର ଦିଆଯାଇଛି । ଥରେ ଚାର୍ଜ କଲେ ଏଥିରେ ୧୧୦ କିଲୋମିଟର ଯାତ୍ରା କରିହେବ । ସେହିଭଳି ଏହାର ଟପ୍ ସ୍ପିଡ୍ ୫୦ କିଲୋମିଟର ପ୍ରତି ଘଣ୍ଟା ରହିବ ।
କମ୍ପାନୀ ଏହି ଗାଡି ସହିତ ଏକ ପୋର୍ଟେବଲ ଚାର୍ଜର ମଧ୍ୟ ଦେବ । ଏହି ଇଲେକ୍ଟ୍ରିକ୍ ମୋପେଡକୁ ୪ ଘଣ୍ଟାରେ ଫୁଲ ଚାର୍ଜ କରିହେବ । ସୁରକ୍ଷା ଦୃଷ୍ଟିରୁ ଏଥିରେ କମ୍ବି ଡ୍ରମ୍ ବ୍ରେକ୍ ମିଳିବ । ଏହି ଇଲେକ୍ଟ୍ରିକ୍ ଲୁନାର ସମୁଦାୟ ଓଜନ ୯୬ କିଲୋ ରହିଛି ।
