କୁଷ୍ଠ କଲୋନିବାସୀଙ୍କ ସହିତ ନିଜ ଘରେ ସାଙ୍ଗରେ ଖାଇଲେ ଡ଼ାକ୍ତର ଶଙ୍କର ରାମଚନ୍ଦାନୀ

ବୁର୍ଲା : କୁଷ୍ଠ ରୋଗୀଙ୍କୁ ଲୋକେ ଘୃଣା ଦୃଷ୍ଟିରେ ଦେଖୁଥିବା ବେଳେ ସମାଜକୁ ଏକ ବାର୍ତ୍ତା ଦେବାକୁ ଯାଇ ଭିମସାରର ସହକାରୀ ପ୍ରଫେସର ଡ଼ାକ୍ତର ଶଙ୍କର ରାମଚନ୍ଦାନୀ ନିଜ ଘରେ ରୋଗୀଙ୍କୁ ଭୋଜନ କରାଇବା ସହିତ ସାଙ୍ଗରେ ବସି ଖାଇଥିଲେ। ପୁର୍ବରୁ ମଧ୍ୟ କେତେବେଳେ କୃଷ୍ଟ ରୋଗୀଙ୍କୁ କାନ୍ଧରେ ବୋହି ରାସ୍ତା ପାରି କରିଛନ୍ତି ତ ଆଉ କେତେବେଳେ ନିଜ ଗାଡିରେ ନେଇ ମେଡିକାଲକୁ ଚିକିତ୍ସା କରାଇଛନ୍ତି । ସେହିପରି ଡାକ୍ତର ରାମଚନ୍ଦାନୀଙ୍କ ଜନ୍ମଦିନ ଥିବାରୁ ୮ ରୁ୧୦ଜଣ କୁଷ୍ଠ ରୋଗୀଙ୍କୁ ଭୋଜନ କରିବାର ବ୍ୟବସ୍ଥା କରିବା ସହିତ ସେମାନଙ୍କ ସହିତ ଏକାସାଙ୍ଗରେ ବସି ନିଜେ ମଧ୍ୟ ଭୋଜନ କରି ସମାଜକୁ ଏକ ବାର୍ତା ଦେଇଥିବା ଦେଖିବାକୁ ମିଳିଛି। ଡାକ୍ତର ରାମଚନ୍ଦାନୀଙ୍କ ଏଭଳି ପଦକ୍ଷେପ ଏବେ ସାମାଜିକ ଗଣମାଧ୍ୟଠାରୁ ଆରମ୍ଭ କରି ସ୍ଥାନୀୟ ଅଞ୍ଚଳରେ ପ୍ରଶଂସା ସାଉଁଟୁଛି । ବୁର୍ଲା ଜୁହ୍ନାପାଣି କୁଷ୍ଠ କଲୋନୀକୁ ପୋଷ୍ୟ ଗ୍ରାମ ଭାବେ ଡ଼ାକ୍ତର ଶଙ୍କର ରାମଚନ୍ଦାନୀ ଗ୍ରହଣ କରିଛନ୍ତି । ଏଠାରେ ବସବାସ କରୁଥିବା କୁଷ୍ଠରୋଗୀଙ୍କୁ ଅନେକ କ୍ଷେତ୍ରରେ ସହାୟତା ପ୍ରଦାନ କରି ଆସୁଛନ୍ତି । ସମାଜରେ କୁଷ୍ଠରୋଗୀଙ୍କ ପ୍ରତି ଲୋକଙ୍କ ମଧ୍ୟରେ ରହିଥିବା ମନୋଭାବ ଏବଂ ଘୃଣାଭାବକୁ ଦୁର କରିବା ପାଇଁ ଉଦ୍ୟମ କରିଥିବା ନଜିର ରହିଛି ।  ଡାକ୍ତର ରାମଚନ୍ଦାନୀଙ୍କ ଜନ୍ମଦିବସ ଅବସରରେ କୁଷ୍ଠରୋଗୀ କଲୋନିର ପ୍ରାୟ ୮ ରୁ ୧୦ ଜଣ ମହିଳା କୁଷ୍ଠ ରୋଗୀଙ୍କୁ ଭୋଜନର ବ୍ୟବସ୍ଥା କରିଥିଲେ। ଡାକ୍ତର ରାମଚନ୍ଦାନୀ ଏହି କୁଷ୍ଠରୋଗୀ ବୃଦ୍ଧା ମାନଙ୍କୁ ନିଜ ଘର ମଧ୍ୟରେ ବସାଇ ଭୋଜନ କରାଇଛନ୍ତି। କେବଳ ଏତିକି ନୁହେଁ ନିଜେ ଡାକ୍ତର ରାମଚନ୍ଦାନୀ ବୃଦ୍ଧା ମାନଙ୍କ ସହିତ ଏକାଠି ବସି ନିଜେ ମଧ୍ୟ ମଧ୍ୟାହ୍ନ ଭୋଜନ କରିଥିବା ଦେଖିବାକୁ ମିଳିଛି । ଡାକ୍ତର ରାମଚନ୍ଦାନୀ ନିଜେ ଜଣେ ଡାକ୍ତର ହେବା ସହିତ ସମାଜରେ କୁଷ୍ଟରୋଗୀଙ୍କ ପ୍ରତି ଲୋକଙ୍କ ମଧ୍ୟରେ ରହିଥିବା ଅନ୍ଧବିଶ୍ୱାସ ଏବଂ ଭ୍ରମକୁ ଦୁର କରିବା ପାଇଁ ଏଭଳି ବାର୍ତ୍ତା ଦେଇଥିବା ସେ କହିଛନ୍ତି । କୁଷ୍ଠରୋଗୀ ମାନଙ୍କୁ ମଧ୍ୟ ସମାଜ ଘୃଣା ଦୃଷ୍ଟିରେ ନ ଦେଖିବା ସହିତ ସେମାନେ ମଧ୍ୟ ସାଧାରଣ ଲୋକଙ୍କ ଭଳି ତଥା ଲୋକଙ୍କ ମଧ୍ୟରେ ରହିଥିବା ଅନ୍ଧବିଶ୍ୱାସକୁ ଲୋକେ ଦୂର କରନ୍ତୁ ବୋଲି ଡାକ୍ତର ରାମଚନ୍ଦାନୀ ମତବ୍ୟକ୍ତ କରିଛନ୍ତି । ତାଙ୍କର ଏଭଳି ପ୍ରୟାସ ପୁଣି ଆଜି ସାମାଜିକ ଗଣମାଧ୍ୟମରେ ଚର୍ଚ୍ଚାର ବିଷୟ ପାଲଟିଛି ।