ବହୁ ଚର୍ଚ୍ଚିତ ହାସ୍ୟରସାତ୍ମକ କାର୍ୟ୍ୟକ୍ରମ ‘ଦ କପିଲ ଶର୍ମା ଶୋ’ର ସବୁଠୁ ଲୋକପ୍ରିୟ ଚରିତ୍ର ଥିଲେ କପିଲ ଓ ଡକ୍ଟର ମଶହୂର ଗୁଲାଟୀ। ଡାକ୍ତର ଚରିତ୍ରରେ ଅବତୀର୍ଣ୍ଣ ହୋଇଥିଲେ ଅଭିନେତା ସୁନିଲ ଗ୍ରୋଭର। ତେବେ କପିଲ ଓ ସୁନିଲଙ୍କ ବ୍ୟକ୍ତିଗତ ବଚସା କାରଣରୁ କାର୍ୟ୍ୟକ୍ରମଟି ମାସ କେଇଟାରେ ବନ୍ଦ ହୋଇଯାଇଥିଲା।
ହେଲେ ଆଜି ପର୍ୟ୍ୟନ୍ତ ଦର୍ଶକଙ୍କ ମନରୁ ଲିଭିନାହିଁ ଡକ୍ଟର ମଶହୂର ଗୁଲାଟୀ ଚରିତ୍ର। ଏଇ ନିକଟରେ ଭାରତୀୟ କଳାକାର ତଥା ଗାୟକ ଭାବେ ଜଣାଯାଉଥିବା ମ୍ୟାଙ୍ଗ୍ ଚ୍ୟାଙ୍ଗ୍ ଶ୍ରୀଲଙ୍କାରେ ଛୁଟି କାଟୁଥିଲେ। ସେଠା ସମୁଦ୍ରକୂଳରେ ବୁଲୁଥିବା ସମୟରେ ମ୍ୟାଙ୍ଗ୍ ଭେଟିଥିଲେ ଜଣେ ବ୍ୟକ୍ତିଙ୍କୁ, ଯାହାଙ୍କ ଚେହେରା ଡକ୍ଟର ମଶହୂର ଗୁଲାଟୀ ଚେହେରା ସହ ସମ୍ପୂର୍ଣ୍ଣ ମେଳ ଖାଉଥିଲା।
ମ୍ୟାଙ୍ଗ୍ ଆଉ ବିଳମ୍ବ ନ କରି ତୁରନ୍ତ ସେହି ବ୍ୟକ୍ତିର ଫଟୋ ଟ୍ବିଟର ସୋସିଆଲ ଆକାଉଣ୍ଟରେ ଅପଲୋଡ କରିଥିଲେ। ତେବେ ସୁନିଲ ନିଜେ ଏହି ଫଟୋ ଦେଖିବା ପରେ ଉଲ୍ଲେଖ କରିଛନ୍ତି ଯେ ‘ଐସା କୌନ୍ ଦିଖତା ହୈ ଭାଇ’! ପ୍ରଶଂସକ ଏଯାଏ ତାଙ୍କ ଚରିତ୍ରକୁ ଭୁଲିନାହାନ୍ତି, ଏହା ତାଙ୍କ ପାଇଁ ବଡ଼ ପୁରସ୍କାର ବୋଲି କହିଛନ୍ତି ସୁନିଲ।
