ଓଲଟିଲା ଡିଜେ ଗାଡ଼ି ; ମୋରଡ଼ା ଉଡ଼ା ଯାତ୍ରାରେ ଅଘଟଣ

ବାରିପଦା/ସାନମୁଣ୍ଡାବଣି : ମୟୂରଭଞ୍ଜ ଜିଲା ମୋରଡ଼ା ଉଡ଼ା ଯାତ୍ରାରେ ଗୁରୁବାର ରାତିରେ ଏକ ଅଘଟଣ ଘଟିଛି । ଉଡ଼ା ଯାତ୍ରା ସ୍ଥଳକୁ ଡିଜେ ବ୍ୟାଣ୍ଡର ତାଳେ ତାଳେ ନାଚି ନାଚି ଯାଉଥିବା ଲୋକଙ୍କ ଉପରେ ସାଉଣ୍ଡବକ୍ସ ଚାପି ହୋଇଯିବାରୁ ୫ଜଣ ଗୁରୁତର ଆହତ ହୋଇଥିବା ଜଣାପଡିଛି। ସେମାନଙ୍କୁ ଦମକଳ ଗାଡ଼ି ସହାୟତାରେ ପ୍ରଥମେ ବାରମାଇଲସ୍ଥ କିଷାନତାଣ୍ଡି ଡାକ୍ତରଖାନାରେ ପ୍ରାଥମିକ ଚିକିତ୍ସା କରାଯିବା ପରେ ବାରିପଦା ପିଆରଏମ ମେଡ଼ିକାଲକୁ ସ୍ଥାନାନ୍ତର କରାଯାଇଛି। ସେମାନଙ୍କ ମଧ୍ୟରୁ ତିନିଜଣଙ୍କ ଅବସ୍ଥା ଗୁରୁତର ଥିବା କୁହାଯାଉଛି।

ମିଳିଥିବା ସୂଚନା ଅନୁସାରେ ଏକ ଭୁଟୁଭୁଟିରେ ସାଉଣ୍ଡବକ୍ସ ଲଦା ହୋଇ ଶୋଭାଯାତ୍ରା ଯାଉଥିଲା। ଗୀତର ତାଳେ ତାଳେ ଲୋକେ ନୃତ୍ୟ କରୁଥିଲେ। ତେବେ ଭାରସାମ୍ୟ ହରାଇ ଭୁଟୁଭୁଟି ରିକ୍ସା ଓଲଟି ପଡ଼ିବାରୁ ସେଥିରେ ଲଦା ହୋଇଥିବା ସାଉଣ୍ଡବକ୍ସ ଓଲଟି ପଡ଼ିଥିଲା ଓ କିଛି ଲୋକ ସେଥିରେ ଚାପି ହୋଇ ଗୁରୁତର ଆହତ ହୋଇଥିଲେ। ଗୁରୁତର ଆହତ ହୋଇ ବାରିପଦା ସ୍ଥାନାନ୍ତର ଲୋକଙ୍କ ମଧ୍ୟରେ ଭୀମ ମାରାଣ୍ଡି, ଚନ୍ଦନ ମୁଖୀ, ରାଜୁ ମୁଖୀ ଥିବା କୁହାଯାଉଥିବା ବେଳେ ଅନ୍ୟ ଦୁଇଜଣଙ୍କ ପରିଚୟ ମିଳିପାରିନାହିଁ।