ଧାମରା: ଚଳିତ ନିର୍ବାଚନ ସମୟରେ ରାଜ୍ୟ ବିଜେପି ଯୁବ ମୋର୍ଚା ସଭାପତି ଅଭିଳାଷ ପଣ୍ଡା ଏବଂ ତାଙ୍କର ୩ ସହଯୋଗୀ ମାନଙ୍କୁ ମରଣାତ୍ନକ ଆକ୍ରମଣ ଘଟଣା ଘଟିବାର ୯ଦିନ ବିତିଯାଇଥିଲେ ମଧ୍ୟ ମୁଖ୍ୟ ଆସାମୀ ମାନଙ୍କୁ ଗିରଫ କରିବାରେ ପୁଲିସ ବିଫଳ ହୋଇଛି ବୋଲି ବିଜେପି ଦାବୀ କରିଛି। ଇତି ମଧ୍ୟରେ ରାଜ୍ୟରେ ବିଜେପି ସରକାର ଗଠନ କରିବାର ପ୍ରସ୍ତୁତି ଚାଲିଥିବା ବେଳେ ବିଜେପି ର ରାଜ୍ୟ ସଭାପତିଙ୍କ ସମେତ ବହୁ ନେତା ଦିଲ୍ଲୀରେ ଯାଇ ପହଞ୍ଚିଛନ୍ତି। ମାତ୍ର ବିଜେପି ଯୁବ ମୋର୍ଚା ସଭାପତି ଅଭିଳାଷ ପଣ୍ଡା ଏବେବି ସଂପୂର୍ଣ ସୁସ୍ଥ ହୋଇ ନାହାନ୍ତି ବୋଲି ବିଜେପି ରାଜ୍ୟ ସଭାପତି ମନମୋହନ ସାମଲ ନିଜର ପ୍ରତିକ୍ରିୟା ରଖିଛନ୍ତି।
ବାଂଶଡା ଥାନାଧିକାରୀ ଗତ ୨୯ତାରିଖ ଦିନ ୫ ଅଭିଯୁକ୍ତ ଙ୍କୁ ଏବଂ ଜୁନ ୩ତାରିଖ ଦିନ ଅନ୍ୟ ୫ଜଣ ଅଭିଯୁକ୍ତ ମାନଙ୍କୁ ଗିରଫ କରି କୋର୍ଟ ଚାଲାଣ କରିଥିବା ବେଳେ ଗତକାଲି ବିଳମ୍ବିତ ରାତିରେ କରଞମାଳ ପଂଚାୟତର ପ୍ରମୋଦ ନାୟକ (ଦିଲୁ)ଙ୍କୁ ମଧ୍ୟ ଗିରଫ କରି ଆଜି କୋର୍ଟ ଚାଲାଣ କରିଛି ବାଂଶଡା ପୁଲିସ । ଏହି ମାମଲାରେ ବାଂଶଡା ପୁଲିସ ପକ୍ଷପାତିତା କରି ମୁଖ୍ୟ ଆସାମୀଙ୍କୁ ଗିରଫ କରିବାରେ ଟାଳଟୁଳ ନୀତି ଅବଲମ୍ବନକରୁଛି ବୋଲି ଚାନ୍ଦବାଲି ବିଜେପି ପକ୍ଷରୁ ପ୍ରତିକ୍ରିୟା ପ୍ରକାଶ ପାଇଛି।
ମୁଦାଲା ଭାବେ କ୍ରମିକ ନଂ ୧ ରୁ ଆରମ୍ଭ କରି ୧୦ପର୍ଯ୍ୟନ୍ତ ଥିବା କ୍ରମିକ ସଂଖ୍ୟାରେ ଥିବା ଆସାମୀ ମାନଙ୍କୁ କାହିଁକି ଗିରଫ କରାଯାଉ ନାହିଁ ବୋଲି ବିଜେପି ପକ୍ଷରୁ ପ୍ରତିକ୍ରିୟା ପ୍ରକାଶ ପାଇଥିବା ବେଳେ ବିଧାୟକଙ୍କ ଚାପରେ ବାଂଶଡା ଥାନାଧିକାରୀ ଏମାନଙ୍କୁ ଘଣ୍ଟ ଘୋଡାଇ ଚାଲିଛନ୍ତି। ଶିକ୍ଷକ ନେତା ମନୋରଞନ ମହାନ୍ତି, ଅକ୍ଷୟ ନାୟକ, ନିତ୍ୟାନନ୍ଦ ପ୍ରଧାନ, ସୁଦର୍ଶନ ମଲିକ ଏବଂ ମଣ୍ଟୁ ନାୟକ ନାମରେ ଏତଲା କଟାଯାଇଥିବା ବେଳେ ତୁରନ୍ତ ଏହି ଆସାମୀ ମାନଙ୍କୁ ଗିରଫ କରିବାକୁ ରାଜ୍ୟ ବିଜେପି ସଭାପତି ମନମୋହନ ସାମଲ ଦିଲ୍ଲୀ ଗସ୍ତ ପୂର୍ବରୁ ନିଜର ପ୍ରତିକ୍ରିୟା ରଖିଛନ୍ତି।
