ଆଠଗଡ : ଆଠଗଡ ଥାନା ଅନ୍ତର୍ଗତ କୁଲାଇଲୋ ଗ୍ରାମରେ ଅବାଧ ଚୋରା ଦେଶୀମଦ କାରବାର ଯୋଗୁଁ ଗ୍ରାମରେ ବିଶୃଙ୍ଖଳା ସୃଷ୍ଟି ହେବା ସହ ଆଇନଶୃଙ୍ଖଳା ପରିସ୍ଥିତି ସୃଷ୍ଟି ହେଉଛି। ଗ୍ରାମର କେତେକ ଭଦ୍ରବ୍ୟକ୍ତି ଚୋରା ଦେଶୀମଦ ବିକ୍ରୟ କରୁଥିବା ଲୋକଙ୍କୁ ମଦ ବିକ୍ରି ବନ୍ଦ କରିବାକୁ ଯେତେ ତାଗିଦ ଓ ବାରଣ କଲେ ମଧ୍ୟ ସେମାନେ କର୍ଣ୍ଣପାତ କରୁନାହାନ୍ତି। ସେମାନଙ୍କ ଠାରୁ ମଦ ପିଇ କିଛି ଖଳ ପ୍ରକୃତିର ଲୋକ ଏବଂ ଅସାମାଜିକ ତତ୍ତ୍ବ ଗ୍ରାମରେ ସବୁବେଳେ କିଛି ନା କିଛି ବିଶୃଙ୍ଖଳା କରି ଅଶାନ୍ତ ବାତାବରଣ ସୃଷ୍ଟି କରୁଛନ୍ତି। ଏହି ଗ୍ରାମରେ ଆଠଗଡ ବ୍ଲକର ଓଡ଼ିଶା ଆଦର୍ଶ ବିଦ୍ୟାଳୟ , ଏକ ହାଇସ୍କୁଲ ଓ ଆୟୁର୍ବେଦିକ ଅସ୍ଥି ଚିକିତ୍ସା କେନ୍ଦ୍ର ରହିଅଛି। ଅସ୍ଥି ଚିକିତ୍ସା କେନ୍ଦ୍ରକୁ ଦୈନିକ ରାଜ୍ୟ ବିଭିନ୍ନ ଅଞ୍ଚଳରୁ ଶହ ଶହ ଲୋକ ଆସୁଛନ୍ତି। ମଦ୍ୟପ ଓ ମଦ ବିକୁଥିବା ବ୍ୟକ୍ତିଙ୍କ ଯୋଗୁଁ ସବୁବେଳେ କୁଲାଇଲୋ ଗ୍ରାମରେ ଅଶାନ୍ତ ପରିସ୍ଥିତି ସୃଷ୍ଟି ହେଉଥିବାରୁ ଗ୍ରାମବାସୀ ପାଇଁ ଏସବୁ ଅସହ୍ୟ ହୋଇପଡିଛି। ଫଳରେ କୁଲାଇଲୋ ଗ୍ରାମରେ ଚୋରା ମଦ କାରବାରକୁ ସମ୍ପୂର୍ଣ୍ଣ ବନ୍ଦ କରିବାକୁ ପୁଲିସ ଓ ଅବକାରୀ ବିଭାଗ ପଦକ୍ଷେପ ନେବାକୁ ଗ୍ରାମବାସୀ ଦାବି କରିଛନ୍ତି । ମଙ୍ଗଳବାର ଗ୍ରାମବାସୀଙ୍କ ପକ୍ଷରୁ ଏକ ପ୍ରତିନିଧି ଦଳ ଆଠଗଡ ଉପଜିଲ୍ଲାପାଳଙ୍କ ଅନୁପସ୍ଥିତିରେ ଡେପୁଟି କଲେକ୍ଟର ମଧୁସ୍ମିତା ବିଶିଙ୍କୁ ଲିଖିତ ଅଭିଯୋଗ କରି ତୁରନ୍ତ ପଦକ୍ଷେପ ଗ୍ରହଣ କରିବା ପାଇଁ ନିବେଦନ କରିଛନ୍ତି।
Comments are closed.