ନୂଆଦିଲ୍ଲୀ: ଶାହଦରା ଜିଲା କୃଷ୍ଣନଗର ଅଂଚଳରେ ବାହାଘର ପାଇଁ ଘୋଡାରେ ଯାଉଥିବା ବେଳେ ଅଚାନକ ବର ବେକରୁ ଟଙ୍କା ମାଳା ଛିଡି ପଡିଥିଲା । ମାଳାରେ ୫୦୦ ଓ ୧୦୦ ଟଙ୍କିଆ ନୋଟ୍ ରହିଥିଲା । ଏହି ସମୟରେ ଜଣେ ବ୍ୟକ୍ତି ଟଙ୍କା ମାଳ ଧରି ଚମ୍ପଟ ମାରିଥିଲା । ବିବାହ କାର୍ଯ୍ୟକ୍ରମ ଶେଷ ହେବାର ୭ଦିନ ପରେ ବର ତରୁଣ କୁମାର ଅଭିଯୁକ୍ତକୁ ଧରି ପୁଲିସ ଜିମା ଦେଇଛନ୍ତି । ମୁଖ୍ୟ ଅଭିଯୁକ୍ତର ନାମ ରାଜୁ ବୋଲି ଜଣାପଡିଛି । ତରୁଣ କୁମାର ବୃତ୍ତିରେ ଓକିଲ ଓ ସେ କୃଷ୍ଣାନଗରର ଗୋଣ୍ଡଲି ଗାଁରେ ରହୁଛନ୍ତି । ବିବାହ ପରେ ଅଭିଯୁକ୍ତକୁ ଧରିବା ପାଇଁ ପୁଲିସ ସହିତ ଖୋଦ ତରୁଣ ମଧ୍ୟ ଲାଗିପଡିଥିଲେ । ସୋମବାର ଅଭିଯୁକ୍ତ ରାଜୁଙ୍କୁ ଗୋଣ୍ଡଲି ଗାଁରୁ ଧରିବା ପରେ ପୁଲିସକୁ ହସ୍ତାନ୍ତର କରିଥିଲେ । ପୁଲିସ ଅଧିକ ତଦନ୍ତ ଜାରି ରଖିଥିବା ବେଳେ ଅନ୍ୟ ଅଭିଯୁକ୍ତଙ୍କୁ ଧରିବାକୁ ପ୍ରୟାସ କରୁଛି ।
Comments are closed.