ଦେବଗଡ଼ :ଭୁବେନଶ୍ୱର ସ୍ଥିତ କିଟ୍-କିସ୍ ପରିସରରେ ଚାଲିଥିବା ୬୯ ତମ ଓଡିଶା ରାଜ୍ୟ ଆଥେଲେଟେିକ ମିଟରେ ସବ ଜୁନିୟର, ଜୁନିୟର ଓ ସିନିୟର ବର୍ଗ ପାଦଚଲା ପ୍ରତିଯୋଗିତାରେ ଦେବଗଡ ଜିଲାର ପ୍ରତିଯୋଗୀ ମାନଙ୍କୁ ଉଲ୍ଲେଖନୀୟ ସଫଳତା ମିଳିଛି। ୨୦ ବର୍ଷରୁ କମ ବାଳିକା ବର୍ଗ ୧୦ ହଜାର ମିଟର ପାଦଚଲା ପ୍ରତିଯୋଗିତାରେ ଦେବଗଡର ତିଶା ବାରିକ ପ୍ରଥମ ସ୍ଥାନ ଅଧିକାର କରିଛନ୍ତି।
ଅନୁରୂପ ଭାବେ ୧୮ ବର୍ଷରୁ କମ ବାଳିକା ବର୍ଗ ୫ ହଜାର ମିଟର ପାଦଚଲା ପ୍ରତିଯୋଗିତାରେ ନିଶା ବାରିକ ପ୍ରଥମ ସ୍ତାନ ଅଧିକାର କରିଛନ୍ତି। ସେହିପରି ୧୮ ବର୍ଷରୁ କମ ବାଳକ ବର୍ଗ ୧୦ ହଜାର ମିଟର ପାଦଚଲା ପ୍ରତିଯୋଗିତାରେ ଜିତ ବାରିକ ପ୍ରଥମ ସ୍ଥାନ ଅଧିକାର କରିଥିବା ବେଳେ ୧୬ ବର୍ଷରୁ କମ ବାଳିକା ବର୍ଗ ୩ ହଜାର ମିଟର ପାଦଚଲା ପ୍ରତିଯୋଗିତାରେ ରିତ ବାରିକ ପ୍ରଥମ ସ୍ଥାନ ଅଧିକାର କରି ଦେବଗଡ ଜିଲା ପାଇଁ ଗୌରବ ଆଣିଛନ୍ତି। ୨୦ ବର୍ଷରୁ କମ ବାଳକ ବର୍ଗ ୧୦ ହଜାର ମିଟର ପାଦଚଲା ପ୍ରତିଯୋଗିତାରେ ସାଇ ସ୍ପନ୍ଦନ ବେହେରା ତୃତୀୟ ସ୍ଥାନ ଅଧିକାର କରିଥିବା ଜଣାପଡିଛି। ପ୍ରତିଯୋଗୀ ମାନଙ୍କର ଏଭଳି ସଫଳତା ପାଇଁ ସେମାନଙ୍କ ନିକଟକୁ ବିଭିନ୍ନ ମହଲରୁ ଶୁଭେଚ୍ଛା ଜ୍ଞାପନ କରାଯାଇଛି। ଏଠାରେ ସୂଚନା ଯୋଗ୍ୟ ଯେ, ସଫଳତା ପାଇଥିବା ଉପରୋକ୍ତ ସମସ୍ତ ପ୍ରତିଯୋଗୀ ଦେବଗଡ ପୌରାଞ୍ଚଳବଣିଅଁସାହିର ବାସୀନ୍ଦା ଏବଂ ସମ୍ପର୍କରେ ଭାଇ ଭଉଣୀ ଅଟନ୍ତି।
