ବାରବାଟୀ ଭାରତ-ଇଣ୍ଡିଜ୍ ଦିନିକିଆ ମ୍ୟାଚ୍ ପାଇଁ ପ୍ରସ୍ତୁତି ଆରମ୍ଭ
ଚାଲିଛି ଫ୍ଲଡ୍ଲାଇଟ୍ ମରାମତି କାମ
କଟକ : ଡିସେମ୍ବର ୨୨ରେ କଟକର ବାରବାଟୀ ଷ୍ଟାଡିୟମ୍ରେ ଘରୋଇ ଭାରତ ଓ ୱେଷ୍ଟଇଣ୍ଡିଜ୍ ମଧ୍ୟରେ ଦିନିକିଆ ମ୍ୟାଚ୍ ଖେଳାଯିବ। ଏହି ଦିବାରାତ୍ର ମ୍ୟାଚ୍ ପାଇଁ ପ୍ରସ୍ତୁତି କାର୍ଯ୍ୟ ଜୋର୍ସୋରରେ ଚାଲିଛି। ବିଶେଷକରି ଫଣି ବାତ୍ୟାରେ ସମ୍ପୂର୍ଣ୍ଣ ଭାଙ୍ଗି ଯାଇଥିବା ବାରବାଟୀ ଷ୍ଟାଡିୟମ୍ର ଫ୍ଲଡ୍ଲାଇଟ୍ର ମରାମତି କାର୍ଯ୍ୟ ସୋମବାରଠାରୁ ଆରମ୍ଭ ହୋଇଛି। ବହୁ ବର୍ଷ ତଳେ ଏହି ଫ୍ଲଡ୍ଲାଇଟ୍ ଲଗାଇଥିବା କପିଳ ଦେବଙ୍କ ଦେବ୍ ମସ୍କୋ କମ୍ପାନୀର ଇଞ୍ଜିନିୟର ଓ କର୍ମଚାରୀ କଟକ ଆସି ଏହି ଫ୍ଲଡ୍ଲାଇଟ୍ ମରାମତି କରୁଛନ୍ତି।
ଗତ ମେ’ ମାସରେ ହୋଇଥିବା ଫଣି ବାତ୍ୟାରେ ବାରବାଟୀ ଷ୍ଟାଡିୟମ୍ରେ ଥିବା ୮ଟିଯାକ ଲାଇଟ୍ ସ୍ତମ୍ଭର ଫ୍ଲଡ୍ଲାଇଟ୍ ସବୁ ଭାଙ୍ଗି ଯାଇଥିଲା। ଗତମାସରେ ବିସିସିଆଇ ଏଜିଏମ୍ରେ ଭାରତ-ୱେଷ୍ଟଇଣ୍ଡିଜ୍ ଦିନିକିଆ ମ୍ୟାଚ୍ ପାଇଁ ଏହି ଫ୍ଲଡ୍ଲାଇଟ୍ ମରାମତି ପ୍ରସଙ୍ଗ କଥା ବିସିସିଆଇ ସଭାପତି ସୌରଭ ଗାଙ୍ଗିଲଙ୍କ ନିକଟରେ ଉଠାଇଥିଲେ ଓଡ଼ିଶା କ୍ରିକେଟ ଆସୋସିଏସନ୍ (ଓସିଏ)ର ସମ୍ପାଦକ ସଞ୍ଜୟ ବେହେରା ଓ ସଭାପତି ପଙ୍କଜ ଲୋଚନ ମହାନ୍ତି। ଖୁବ୍ ଶୀଘ୍ର ଫ୍ଲଡ୍ଲାଇଟ୍ ମରାମତି କରାଯିବ ବୋଲି ଗାଙ୍ଗୁଲି ପ୍ରତିଶ୍ରୁତି ଦେଇଥିଲେ। ଏହା ଅନୁସାରେ ଦେବ୍ ମସ୍କୋର ଇଞ୍ଜିନିୟର ଓ କର୍ମଚାରୀ ଫ୍ଲଡ୍ଲାଇଟ୍ ମରାମତି କାର୍ଯ୍ୟ ଆରମ୍ଭ କରିଛନ୍ତି। ପ୍ରଥମଦଫାରେ ସେମାନେ ଲାଇଟ୍ ଟାୱରରେ ଥିବା ଭଙ୍ଗା ଫ୍ଲଡ୍ଲାଇଟ୍କୁ କାଢ଼ୁଛନ୍ତି। ଏହା ସ୍ଥାନରେ ନୂଆ ଫ୍ଲଡ୍ଲାଇଟ୍ ଚଳିତ ସପ୍ତାହରେ ଲଗାଯିବ। ଏଣେ ଉପରୋକ୍ତ ଦିନିକିଆ ମ୍ୟାଚ୍ ଲାଗି ବାରବାଟୀ ଷ୍ଟାଡିୟମ୍ର ପଡ଼ିଆ ଓ ପିଚ୍ ପ୍ରସ୍ତୁତି କାର୍ଯ୍ୟ ଜୋର୍ସୋରରେ ଚାଲିଛି। ବିଶେଷକରି ସମସ୍ତ ଗ୍ୟାଲେରୀରେ ଥିବା ଶୌଚାଳୟକୁ ଭାଙ୍ଗି ନୂତନ ଶୌଚାଳୟ ନିର୍ମାଣ ସହ ଯଥେଷ୍ଟ ପାନୀୟ ଜଣ ବ୍ୟବସ୍ଥା କରାଯିବା ଉପରେ ମଧ୍ୟ ଗୁରୁତ୍ବ ଦେଇଛନ୍ତି ଓସିଏ ସମ୍ପାଦକ ସଞ୍ଜୟ ବେହେରା।
Comments are closed.