ତାଳଚେର/ଗୋଡିବନ୍ଧ/ପରଜଙ୍ଗ : ତାଳଚେର ବ୍ଲକ ଗୁରୁଜାଙ୍ଗ ଗ୍ରାମ ପଞ୍ଚାୟତର ସିରିଗିଡା ଗ୍ରାମ ନିକଟସ୍ଥ ବ୍ରାହ୍ମଣୀ ନଦୀରେ କୁମ୍ଭୀର ଆତଙ୍କ ଦେଖାଦେଇଛି। ଏହି ଗ୍ରାମର ଦୁଇଜଣ ଯୁବକ ନଦୀରେ ମାଛ ମାରୁଥିବା ବେଳେ କୁମ୍ଭୀରଟି ନଦୀରେ ଭାସୁଥିବାର ଦେଖି ଭୟଭୀତ ହୋଇ ଲୋକଙ୍କୁ ଡାକ ପକାଇ ଥିଲେ। ଖବର ପାଇ ବନଖଣ୍ଡ ଅଧିକାରୀ ସୁକାନ୍ତି ଦେଈ ଏବଂ ଗୋଡିବନ୍ଧ ପୁଲିସ ଘଟଣାସ୍ଥଳରେ ପହଞ୍ଚି କୁମ୍ଭୀର ଥିବା ଅଞ୍ଚଳରେ କଡ଼ା ନଜର ରଖିଥିଲେ। ଏହି ନଦୀ ଉପରେ ୫ରୁ ୧୦ଟି ଗ୍ରାମର ଲୋକ ନିର୍ଭର କରୁଥିବାରୁ ଏହା ପ୍ରଶାସନ ପାଇଁ ମୁଣ୍ଡବ୍ୟଥାର କାରଣ ପାଲଟିଛି। ଡାକବାଜି ଯନ୍ତ୍ର ସାହାଯ୍ୟରେ ଲୋକଙ୍କୁ ସତର୍କ କରାଯିବା ସହିତ ନଦୀକୁ ନଯିବାକୁ କୁହାଯାଇଛି। ଏଘଟଣାସ୍ଥଳରେ ପହଞ୍ଚି ଲୋକଙ୍କୁ ସତର୍କ ରହିବାକୁ ପରାମର୍ଶ ଦିଆଯାଇଥିବା ବନ ବିଭାଗ କହିଛି। କିନ୍ତୁ କୁମ୍ଭୀରକୁ ଦେଖି ନଥିବା ବନ ବିଭାଗ ସଫେଇ ଦେଇଛି। ସେହିପରି ପରଜଙ୍ଗ ବ୍ଲକ ମାଣକିମରା ଗ୍ରାମ ବ୍ରାହ୍ମଣୀ ନଦୀରେ ସ୍ଥାନୀୟ ଲୋକମାନେ କୁମ୍ଭୀର ଭାସମାନ ଥିବା ଦେଖି ମହାବିରୋଡ ରେଞ୍ଜରଙ୍କୁ ଅବଗତ କରାଇଥିଲେ। ଏଥିନେଇ ରେଞ୍ଜର ହରିଶ ଚନ୍ଦ୍ର କିଷାନ ବନଖଣ୍ଡ ଅଧିକାରୀଙ୍କୁ ଜଣାଇଥିଲେ। ବନଖଣ୍ଡ ଅଧିକାରୀଙ୍କ ନିର୍ଦେଶକ୍ରମେ ମହାବିରୋଡ ରେଞ୍ଜ ରଙ୍ଗଥଳୀ ସେକ୍ସନ ବନପାଳ ଓ କର୍ମଚାରୀଙ୍କ ମିଳିତ ଉଦ୍ୟମରେ ବ୍ରାହ୍ମଣୀ ନଦୀ କୂଳିଆ ଗ୍ରାମବାସୀ ନଦୀକୁ ଗାଧୋଇବା, ଶୈାଚ କରିବା ପାଇଁ ନଯିବାକୁ ଡ଼ାକବାଜି ଯନ୍ତ୍ର ମାଧ୍ୟମରେ ସତର୍କ ସୂଚନା ଦେଇଛନ୍ତି। ବ୍ରାହ୍ମଣୀ ନଦୀ କୂଳରେ କୁମ୍ଭୀର ଗତିପଥ ଉପରେ ତୀକ୍ଷ୍ମ ନଜର ରଖିବାକୁ ସମସ୍ତ ବନ କର୍ମଚାରୀଙ୍କୁ ନିର୍ଦ୍ଦେଶ ଦିଆଯାଇଛି ବୋଲି ରେଞ୍ଜ ଶ୍ରୀ କିଷାନ କହିଛନ୍ତି।
Popular Categories
Previous article
Next article