ପାଟଣା : କେନ୍ଦୁଝର ଜିଲ୍ଲା ଦେଇ ଯାଇଥିବା ୪୯ ନଂ ଜାତୀୟ ରାଜପଥ ଅନ୍ତର୍ଗତ ତୁରୁମୁଙ୍ଗା ନିକଟରେ ଗତକାଲି ଏକ ଟ୍ରଲର ଏକ ବାଇକକୁ ଧକ୍କା ଦେଇ ଡିଭାଇଡ଼ରକୁ ଚଢି ଯାଇଥିଲା। ଦୁର୍ଘଟଣାରେ ବାଇକ ଆରୋହୀ ପଶ୍ଚିମ ସିଂଘଭୂମ୍ ର ମନୋହର ମହାରଣା ଗୁରୁତର ହୋଇଥିବା ବେଳେ ଦୁର୍ଘଟଣା ଘଟାଇ ଥିବା ଟ୍ରଲରକୁ ଜବତ କରି ତୁରୁମୁଙ୍ଗା ପୁଲିସ ତଦନ୍ତ କରୁଥିବା ସମୟରେ ଟ୍ରଲର କଣ୍ଟେନର ସିଜି ୦୫ ଏପି ୯୭୯୦ ଭିତରୁ ୩୪ ଗୋରୁ ଙ୍କୁ ଉଦ୍ଧାର କରି ଡ୍ରାଇଭର ସମେତ ୩ ଜଣ ଗୋ ଚାଲାଣକାରୀଙ୍କୁ ତୁରୁମୁଙ୍ଗା ପୁଲିସ ଗିରଫ କରିଛି। ଗୋରୁ ଗୁଡିକୁ ଅତି ଦୟନୀୟ ଅବସ୍ଥାରେ ଗାଡିରେ ମାଫିଆମାନେ ଚାଲାଣ କରୁଥିଲେ। ଗାଡି ଭିତରେ ଗୋଟିଏ ଗୋରୁର ମୃତ୍ୟୁ ହୋଇଥିବା ବେଳେ ପଶୁ ଚିକିତ୍ସକଙ୍କ ଦ୍ୱାରା ଆହତ ଓ ଗୁରୁତର ଗୋରୁଙ୍କୁ ଚିକିତ୍ସା କରାଯିବା ପରେ ରାଇରଙ୍ଗପୁର ଗୋଶାଳାକୁ ଦିଆଯାଇଛି । ଗିରଫ ମାଫିଆମାନେ ଉତ୍ତର ପ୍ରଦେଶର ରାଜ୍ୟ ମୁଜାଫରନଗର ଜିଲ୍ଲା ଥାନା ଖଟୋଲି ଗ୍ରାମ କାଧାଲିର ମହମ୍ମଦ ମହଶୀନ ଏବଂ ପଞ୍ଜାବ ରାଜ୍ୟ ର ଜିଲ୍ଲା ତରତରନ ଗ୍ରାମ କଙ୍ଗ ର ରଣବୀର ସିଂ ଓ ଜସମେଲ ସିଂ ବୋଲି ଜଣାପଡ଼ିଛି। ଗୋ-ଚାଲାଣ କରୁଥିବା ଟ୍ରଲର ଗାଡିଟିକୁ ପୁଲିସ ଜବତ କରିଛି। ପୁଲିସ ଏଏସଆଇ ଦେବେନ୍ଦ୍ର ମୁର୍ମୁଙ୍କ ଏତଲା କ୍ରମେ ଥାନା କେଶ ନଂ ୨୮/୨୦୨୫ ମୂଳେ ଏସଆଇ ରସାନନ୍ଦ ନାଏକ ଘଟଣାର ତଦନ୍ତ କରିବା ସହ ଆଜି ସନ୍ଧ୍ୟାରେ ଗିରଫ ୩ ଜଣଙ୍କୁ କୋର୍ଟ ଚାଲାଣ କରିଛନ୍ତି।
Comments are closed.