ପ୍ରୟାଗରାଜ: ଅଖୀଳ ଭାରତୀୟ ଆଖଡ଼ା ପରିଷଦ ଅଧ୍ୟକ୍ଷ ମହନ୍ତ ନରେନ୍ଦ୍ର ଗିରି ମୃତ୍ୟୁ ମାମଲାରେ ତାଙ୍କ ଶିଷ୍ୟ ମହନ୍ତ ଆନନ୍ଦ ଗିରିଙ୍କ ଅଡ଼ୁଆ ବଢିବାରେ ଲାଗିଛି। ଏହି ମାମଲାରେ ଅଭିଯୁକ୍ତ ଆନନ୍ଦ ଗିରି ଓ ଆଧା ତିୱାରୀଙ୍କୁ ସିଜେଏମ୍ କୋର୍ଟ ବୁଧବାର ୧୪ ଦିନିଆ ନ୍ୟାୟିକ ହେପାଜତକୁ ପଠାଇଛନ୍ତି। ଅଧିକ ପଚରାଉଚରା ପାଇଁ ଅଭିଯୁକ୍ତକୁ ରିମାଣ୍ଡରେ ନେବାକୁ ପୁଲିସ ଏବେ କୋର୍ଟରେ ଆବେଦନ କରିପାରିବ। ପୂର୍ବରୁ ଏହି ମାମଲାରେ ସିବିଆଇ ତଦନ୍ତ ପାଇଁ ମଧ୍ୟ ଦାବି ହୋଇଛି।
ସନ୍ଦେହଜନକ ପରିସ୍ଥିତିରେ ମହନ୍ତ ନରେନ୍ଦ୍ର ଗିରିଙ୍କ ମୃତ୍ୟୁ ମାମଲାର ତଦନ୍ତ ହାଇକୋର୍ଟଙ୍କ ତତ୍ତ୍ୱାବଧାନରେ ସିବିଆଇ ଦ୍ବାରା କରାଇବା ପାଇଁ କରପାତ୍ରୀ ଆଶ୍ରମର ମୁଖ୍ୟ ସନ୍ଥ ଅଭିଷେକ ବ୍ରହ୍ମଚାରୀ ଦାବି କରିଛନ୍ତି।
ସୂଚନାଯୋଗ୍ୟ, ମହନ୍ତ ସ୍ବାମୀ ନରେନ୍ଦ୍ର ଗିରିଙ୍କ ମୃତଦେହ ସୋମବାର ପ୍ରୟାଗରାଜ ସ୍ଥିତ ତାଙ୍କ ମଠରୁ ଝୁଲନ୍ତା ଅବସ୍ଥାରେ ଉଦ୍ଧାର କରାଯାଇଥିଲା। ଘଟଣା ସାମ୍ନାକୁ ଆସିବା ପରେ ମଠର ସମ୍ପତ୍ତି ବିବାଦକୁ ନେଇ ତାଙ୍କୁ ହତ୍ୟା କରାଯାଇଥିବା ଚର୍ଚ୍ଚା ଜୋର ଧରିଥିଲା।
