ନୂଆଦିଲ୍ଲୀ : ଦେଶରେ ଗତ ୨୪ ଘଣ୍ଟା ଭିତରେ ଆଉ ୧୦୭୬ ଜଣ ଲୋକ କରୋନା ଭୂତାଣୁରେ ସଂକ୍ରମିତ ହେବା ସହ ମୋଟ୍ ସଂକ୍ରମିତ ଲୋକଙ୍କ ସଂଖ୍ୟା ୧୧,୪୩୯କୁ ବୃଦ୍ଧି ପାଇଛି। ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ କହିଛି ଏପର୍ଯ୍ୟନ୍ତ ୩୦୬ଜଣ ସଂକ୍ରମିତ ବ୍ୟକ୍ତି ଆରୋଗ୍ୟ ଲାଭ କରିସାରିଛନ୍ତି। ଗତ ୨୪ ଘଣ୍ଟା ଭିତରେ ୩୮ ଜଣ ସଂକ୍ରମିତ ବ୍ୟକ୍ତିଙ୍କର ପ୍ରାଣ ହାନି ଘଟିବା ସହ ଦେଶରେ ଏ ଜନିତ ମୃତ୍ୟୁସଂଖ୍ୟା ୩୭୭ରେ ପହଞ୍ଚିଛି।
ଭାରତୀୟ ଡାକ୍ତରୀ ଗବେଷଣା ପରିଷଦ-ଆଇସିଏମ୍ଆର୍ ଏପର୍ଯ୍ୟନ୍ତ ୨,୪୦,୮୯୩ଟି ନମୁନାର ପରୀକ୍ଷା କରିଛି। ଗତକାଲି ୨୬ ହଜାର ୩୫୧ଟି ନମୁନାର ପରୀକ୍ଷା କରାଯାଇଥିଲା। ଏଗୁଡ଼ିକ ଦେଶର ବିଭିନ୍ନ ସରକାରୀ ଓ ବେସରକାରୀ ପରୀକ୍ଷାଗାରଗୁଡ଼ିକରେ ପରୀକ୍ଷା କରାଯାଇଛି। ଆଇସିଏମ୍ଆର୍ କରୋନା ଭୂତାଣୁର ପରୀକ୍ଷା ପାଇଁ ପରୀକ୍ଷାଗାର ଗୁଡ଼ିକର ସଂଖ୍ୟା ବୃଦ୍ଧି କରିବାକୁ ଉଦ୍ୟମ ଜାରି ରଖିଛି। ଏଥିପାଇଁ ଉଭୟ ସରକାରୀ ଓ ବେସରକାରୀ ପରୀକ୍ଷାଗାରଗୁଡ଼ିକୁ ଅନୁମତି ଦିଆଯାଉଛି। ଏପର୍ଯ୍ୟନ୍ତ ୧୭୧ଟି ସରକାରୀ ଗବେଷଣାଗାର, ତିନୋଟି ଭୂତାଣୁ ସଂଗ୍ରହ କେନ୍ଦ୍ର ଓ ୭୩ଟି ବେସରକାରୀ ପରୀକ୍ଷାଗାରକୁ କୋଭିଡ୍-୧୯ଭୂତାଣୁର ପରୀକ୍ଷା ପାଇଁ ଅନୁମତି ପ୍ରଦାନ କରାଯାଇଛି।
