କଂଗ୍ରେସ ଅଧ୍ୟକ୍ଷ ନିର୍ବାଚନ : ୯୬% ମତଦାନ

ନୂଆଦିଲ୍ଲୀ : କଂଗ୍ରେସ ଅଧ୍ୟକ୍ଷ ନିର୍ବାଚନ ନିମନ୍ତେ ସୋମବାର ଶାନ୍ତି ଶୃଙ୍ଖଳାର ସହିତ ମତଦାନ ଶେଷ ହୋଇଛି। ଦଳର କେନ୍ଦ୍ରୀୟ ନିର୍ବାଚନ କର୍ତ୍ତୃପକ୍ଷ (ସିଇଏ)ର ଅଧ୍ୟକ୍ଷ ମଧୁସୂଦନ ମିସ୍ତ୍ରି କହିଛନ୍ତି ଯେ ପୂର୍ବାହ୍ଣ ୧୦ଟାରୁ ଅପରାହ୍ଣ ୪ଟା ପର୍ଯ୍ୟନ୍ତ ମତଦାନ ହୋଇଛି। ଏଥିରେ ୯୬% ଭୋଟ ଗ୍ରହଣ ହୋଇଛି। ପ୍ରାୟ ୯୫୦୦ ସଦସ୍ୟ ଏଥିରେ ମତଦାନ କରିଛନ୍ତି। ମତଦାନ ସମୟରେ​‌ କୌଣସି ପ୍ରକାର ଅପ୍ରୀତିକର ପରିସ୍ଥିତି ସୃଷ୍ଟି ହୋଇ ନାହିଁ। ଦିଲ୍ଲୀର ଏଆଇସିସି କାର୍ଯ୍ୟାଳୟରେ ହୋଇଥିବା ମତଦାନ କେନ୍ଦ୍ରରେ ୮୭ଜଣ ଭୋଟ ଦେଇଛନ୍ତି। ଏଠାରେ ସୋନିଆ ଗାନ୍ଧୀ, ପ୍ରିୟଙ୍କା ଗାନ୍ଧୀ ଭଦ୍ରା, ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହ, ପି ଚିଦମ୍ବରମ୍ ପ୍ରମୁଖ ନିଜର ମତଦାନ କରିଥିଲେ। ସେହିପରି କର୍ଣ୍ଣାଟକର ବାଲାରିରେ ହୋଇଥିବା ମତଦାନ କେନ୍ଦ୍ରରେ ରାହୁଲ ଗାନ୍ଧୀଙ୍କ ସମେତ ୫୦ଜଣ ଭୋଟ ଦେଇଛନ୍ତି। ସମସ୍ତ ଭୋଟ ବାକ୍ସଗୁଡିକୁ ଦିଲ୍ଲୀ ଅଣାଯିବା ପରେ ଅକ୍ଟୋବର ୧୯ (ବୁଧବାର) ଭୋଟ ଗଣତି ହେବ। କଂଗ୍ରେସ ଅଧ୍ୟକ୍ଷ ପଦ ପାଇଁ ହୋଇଥିବା ସ୍ବଚ୍ଛ ନିର୍ବାଚନ ଦେଶର ଅନ୍ୟ ରାଜନୈତିକ ଦଳଗୁଡିକ ଲାଗି ଅନୁକରଣୀୟ ହେବା ଉଚିତ୍ ବୋଲି ମିସ୍ତ୍ରି କହିଛନ୍ତି। କଂଗ୍ରେସ ଅଧ୍ୟକ୍ଷ ପଦ ନିର୍ବାଚନକୁ ନେଇ ଦେଖାଯାଇଥିବା ଉତ୍କଣ୍ଠା ପାଇଁ ସୋନିଆ ଖୁସି ବ୍ୟକ୍ତ କରିଛନ୍ତି। ସେ କହିଛନ୍ତି ଏପରି ଦିନକୁ ବହୁତ ଦିନ ହେଲା ଅପେକ୍ଷା କରି ରହିଥିଲି।