ଜୟପୁର: ଜୟପୁରର ମାନସରୋବର ଥାନାରେ ହାସ୍ୟାଭିନେତା ତଥା ଆପ୍ ନେତା ଖୟାଲି ସହାରନ୍ଙ୍କ ବିରୋଧରେ ଦୁଷ୍କର୍ମ ମାମଲା ରୁଜୁ କରାଯାଇଛି। ହନୁମାନଗଡ଼ ନିବାସୀ ଜଣେ ୨୮ ବର୍ଷୀୟ ଯୁବତୀ ତାଙ୍କ ବିରୋଧରେ ଅଭିଯୋଗ କରିଛନ୍ତି। ଯୁବତୀଙ୍କ ଅଭିଯୋଗ ଅନୁଯାୟୀ, ମାର୍ଚ୍ଚ ୧୧ ତାରିଖରେ ତାଙ୍କୁ ହୋଟେଲକୁ ଡକାଇ ଦୁଷ୍କର୍ମ କରାଯାଇଛି। ଯୁବତୀ କହିଛନ୍ତି ଯେ, କମେଡ଼ିଆନ୍ ଖୟାଲି ତାଙ୍କୁ ଓ ତାଙ୍କର ଜଣେ ବାନ୍ଧବୀଙ୍କୁ ଫିଲ୍ମରେ କାମ ଦେବା ବାହାନାରେ ହୋଟେଲକୁ ଡାକିଥିଲେ। ସେଠାରେ ପ୍ରଥମେ ସେ ତାଙ୍କ ସହ ଅସଦାଚରଣ କରିଥିଲେ। ପରେ ତାଙ୍କ ସାଙ୍ଗ ବାହାରକୁ ପଳାଇ ଆସିବା ପରେ ଖୟାଲି ତାଙ୍କୁ ଦୁଷ୍କର୍ମ କରିଥିଲେ। ଏହାପରେ ଅଭିଯୁକ୍ତ କମେଡ଼ିଆନ୍ ତାଙ୍କ ସହଯୋଗୀମାନଙ୍କ ସହ ହୋଟେଲରୁ ପଳାଇ ଯାଇଥିଲେ।
ପୁଲିସ ନିକଟରେ ତାଙ୍କ ଅଭିଯୋଗରେ ମହିଳା ଜଣକ କହିଥିଲେ ଯେ, କିଛିଦିନ ପୂର୍ବରୁ ତାଙ୍କ ସ୍ୱାମୀଙ୍କର ମୃତ୍ୟୁ ହୋଇଛି। ଚାକିରି ସଂପର୍କରେ ସେ ମାର୍ଚ୍ଚ ୯ରେ ଜୟପୁରର ଶାସ୍ତ୍ରୀ ନଗରରେ ରହୁଥିବା ତାଙ୍କର ଜଣେ ବାନ୍ଧବୀଙ୍କ ଘରକୁ ଆସିଥିଲେ। ସାଙ୍ଗଙ୍କ ଘରେ ରହି ମାର୍କେଟିଂ ଚାକିରି ଖୋଜିବା ଆରମ୍ଭ କଲେ।
ମାର୍ଚ୍ଚ ୧୧ରେ ତାଙ୍କ ସାଙ୍ଗ କହିଥିଲେ ଯେ, ଖୟାଲିଙ୍କ ଶୋ’ ମାର୍ଚ୍ଚ ୧୨ରେ ଅଛି । ସେ ଏହି ଶୋ’ରେ ଆମ୍ ଆଦମୀ ପାର୍ଟିର ପ୍ରଚାର କରିବେ। ସେ କହିଥିଲେ ଯେ, ହାସ୍ୟାଭିନେତା ତାଙ୍କୁ ଭେଟିବାକୁ ଡାକିଛନ୍ତି। ତାଙ୍କ ବାନ୍ଧବୀ ମଧ୍ୟ ପ୍ରଥମ ଥର ପାଇଁ ତାଙ୍କୁ ଭେଟିବେ ବୋଲି କହିଲେ ଓ ମୁଁ ଏକୁଟିଆ ଯିବି ନାହିଁ ତୁ ମଧ୍ୟ ମୋ ସାଥିରେ ଚାଲ ବୋଲି କହିଥିଲେ। ହାସ୍ୟାଭିନେତାଙ୍କ କମେଡି ଶୋ’ ପାଇଁ ରାଜସ୍ଥାନୀ କହୁଥିବା ଝିଅମାନଙ୍କର ଆବଶ୍ୟକତା ଅଛି। ଚାକିରି ମଧ୍ୟ ମିଳିପାରେ ବୋଲି ବାନ୍ଧବୀ ତାଙ୍କୁ କହିଥିଲେ।
