ପିପିଲି, (ନି.ପ୍ର):ପୁରୀ ଜିଲାପାଳ ସମର୍ଥ ବର୍ମା ବୁଧବାର ପିପିଲି ବ୍ଲକ ଗସ୍ତରେ ଆସି ବିଭିନ୍ନ ବ୍ୟବସ୍ଥାର ସମୀକ୍ଷା କରିଥିଲେ । ପିପିଲି ବ୍ଳକ ପରିସରରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ କରାଯାଇଥିବା ଭୋଟ୍ ଗଣତି କେନ୍ଦ୍ର ଓ ଆବଣ୍ଟନ କେନ୍ଦ୍ରକୁ ଜିଲାପାଳ ପରିଦର୍ଶନ କରିବା ସହ ସେଠାକାର ସୁରକ୍ଷା ବ୍ୟବସ୍ଥାର ସମୀକ୍ଷା କରିଥିଲେ । ଏହା ସହିତ ବ୍ଳକ ପରିସରରେ ହୋଇଥିବା ମିଶନ ଶକ୍ତି କାଫେକୁ ଜିଲାପାଳ ପରିଦର୍ଶନ କରିବା ସହ ସେଠାକାର ବ୍ୟବସ୍ଥା ସଂପର୍କରେ ସମୀକ୍ଷା କରିଥିଲେ ।
ଏହା ପରେ ରାଜ୍ୟ ସରକାରଙ୍କ ୫ଟି ଅଧିନକୁ ଯାଇଥିବା ପିପିଲି ବ୍ଲକ ଦାଣ୍ଡମୁକୁନ୍ଦପୁର ପଞ୍ଚାୟତର ଗୋପବନ୍ଧୁ ମେମୋରିଆଲ ହାଇସ୍କୁଲକୁ ସେ ପରିଦର୍ଶନ କରିବା ସହ ସେଠାରେ ଚାଲିଥିବା ରୂପାନ୍ତରଣ କାର୍ଯ୍ୟକୁ ତଦାରଖ କରିଥିଲେ । ହାଇସ୍କୁଲ ରୂପାନ୍ତରଣ କାର୍ଯ୍ୟକ୍ରମ ମାଧ୍ୟମରେ ଚାଲିଥିବା ସ୍ମାର୍ଟ ଶ୍ରେଣୀଗୃହ, ଇ-ଲାଇବ୍ରେରୀ, ଅପଗ୍ରେଡ଼େଡ଼ ଲାବୋରେଟୋରୀ (ପ୍ରୟୋଗଶାଳା)ର କାର୍ଯ୍ୟକୁ ଜିଲାପାଳ ଅନୁଧ୍ୟାନ କରିଥିଲେ । ବିଦ୍ୟାଳୟ ପରିସର ଓ ପରିବେଶକୁ ସବୁଜ ସୁନ୍ଦର କରିବା ପାଇଁ ବୃକ୍ଷରୋପଣ, ଖେଳପଡିଆର ଉନ୍ନତୀକରଣ, କ୍ରୀଡା ଉପକରଣ, ବିଶୁଦ୍ଧ ପାନୀୟ ଜଳ ସୁବିଧା ଆଦି ସଂପର୍କରେ ସେ ପିପିଲି ବିଡିଓ ରଶ୍ମିତା ନାଥଙ୍କ ଠାରୁ ପଚାରି ବୁଝିଥିଲେ । ଜିଲାପାଳଙ୍କ ଏହି ଗସ୍ତ ସମୟରେ ଜିଲା ପ୍ରକଳ୍ପ ନିର୍ଦ୍ଦେଶକ ଜ୍ୟୋତିଶଙ୍କର ମହାପାତ୍ର, ବିଡିଓ ରଶ୍ମିତା ନାଥ ପ୍ରମୁଖ ଉପସ୍ଥିତ ଥିଲେ ।
