୨୩ ପର୍ଯ୍ୟନ୍ତ ଶୀତ ଲହରୀ : ଦାରିଙ୍ଗବାଡ଼ିରେ ୪ ଡିଗ୍ରୀ

ଭୁବନେଶ୍ବର : ରାଜ୍ୟରେ ଶୀତ ଲହର ଜାରି ରହିଛି। ଆସନ୍ତା ୨୩ ତାରିଖ ପର୍ଯ୍ୟନ୍ତ ବିଭିନ୍ନ ସ୍ଥାନରେ ହାଡ଼ଥରା ଜାଡ଼ ଅନୁଭୂତ ହେବା ନେଇ ଭୁବନେଶ୍ବର ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ସତର୍କତା ଜାରି କରାଯାଇଛି। ଏହି ସମୟରେ ରାତିର ତାପମାତ୍ରା ୪ରୁ ୬ ଡିଗ୍ରୀ ପର୍ଯ୍ୟନ୍ତ ଖସିବ। ପରବର୍ତ୍ତୀ ସମୟରେ ତାପମାତ୍ରା ୨-୩ ଡିଗ୍ରୀ ପର୍ଯ୍ୟନ୍ତ ବୃଦ୍ଧି ପାଇବ।
ସୋମବାରରୁ ମଙ୍ଗଳବାର ସକାଳ ପର୍ଯ୍ୟନ୍ତ ସୁନ୍ଦରଗଡ଼, ଝାରସୁଗୁଡ଼ା, ବରଗଡ଼, କେନ୍ଦୁଝର, ମୟୂରଭଞ୍ଜ, ବାଲେଶ୍ବର, ସୋନପୁର, ବୌଦ୍ଧ, କନ୍ଧମାଳ, ଭଦ୍ରକ, ଅନୁଗୋଳ, ଢେଙ୍କାନାଳ, ଦେବଗଡ଼ ଓ ସମ୍ବଲପୁର ଗୋଟିଏ କିମ୍ବା ଦୁଇଟି ସ୍ଥାନରେ ପ୍ରବଳ ଶୀତ ଅନୁଭୂତ ହୋଇଥପାରେ। ଏହିସବୁ ସ୍ଥାନ ପାଇଁ ହଳଦିଆ ସତର୍କତା ଜାରି କରାଯାଇଛି। ଏହି ସମୟରେ ସ୍ବାସ୍ଥ୍ୟଗତ ସମସ୍ୟା ଦେଖା ଦେଇପାରେ। ତେଣୁ ରାତି ଓ ଭୋର ସମୟରେ ଘରେ ରହିବାକୁ ପରାମର୍ଶ ଦିଆଯାଇଛି। ଏପରିକି ଗୃହପାଳିତ ପଶୁଙ୍କୁ ବାହାରକୁ ନ ଛାଡ଼ିବାକୁ କୁହାଯାଇଛି। ମଙ୍ଗଳବାରରୁ ବୁଧବାର ପର୍ଯ୍ୟନ୍ତ ସୁନ୍ଦରଗଡ଼, ଝାରସୁଗୁଡ଼ା, ବରଗଡ଼ ଓ କନ୍ଧମାଳ ପ୍ରଭୃତି ଅଞ୍ଚଳରେ ପ୍ରବଳରୁ ଅତି ପ୍ରବଳ ଶୀତ ଅନୁଭୂତ ହେବ। ଏହି ଦିନ ପାଇଁ ୪ ଜିଲା ପାଇଁ ଅରେଞ୍ଜ ସତର୍କତା ଜାରି କରାଯାଇଛି। ଅନ୍ୟପକ୍ଷରେ ଆଜି ଦାରିଙ୍ଗବାଡ଼ିରେ ସର୍ବନିମ୍ନ ତାପମାତ୍ରା ୪ ଡିଗ୍ରୀ ରେକର୍ଡ଼ କରାଯାଇଛି। ଓଡ଼ିଶାର କାଶ୍ମୀର କୁହାଯାଉଥିବା ଦାରିଙ୍ଗବାଡ଼ିରେ ଆଜି ଚଳିତବର୍ଷର ପ୍ରଥମ ଶିଶିରପାତ ହୋଇଛି ା ଅସମ୍ଭାଳ ଶୀତ ସାଙ୍ଗକୁ ବିଭିନ୍ନ ସ୍ଥାନରେ ପୂର୍ବାହ୍ଣ ୧୦ଟା ପର୍ଯ୍ୟନ୍ତ ଘନକୁହୁଡ଼ି ଲାଗି ରହୁଛି ା ଝାରସୁଗୁଡ଼ା ୫.୬, ଫୁଲବାଣୀ ୬.୫, ସୋନପୁର ୬.୯, କେନ୍ଦୁଝରଗଡ଼ ୭.୪, ବଲାଙ୍ଗୀର ଓ ସୁନ୍ଦରଗଡ଼ ୮, ଭବାନୀପାଟଣା ୮.୯, ସମ୍ବଲପୁର, ହୀରାକୁଦ, ଓ ତାଳଚେରରେ ୯, ଟିଟଲାଗଡ଼ରେ ୯.୩, ଓ ବାରିପଦରେ ୯.୫ ଡିଗ୍ରୀ ତାପମାତ୍ରା ରେକର୍ଡ଼ କରାଯାଇଛି।