ମୁମ୍ବଇ : ମୁମ୍ବଇ ବିମାନବନ୍ଦରରେ ବଲିଉଡ ଅଭିନେତା ସଲମାନ ଖାଁଙ୍କୁ ଅଟକାଇବା ପୂର୍ବକ ସୁରକ୍ଷା ଯାଞ୍ଚ ଲାଗି କହିଥିବା ଓଡିଆ ସିଆଇଏସଏଫ୍ ଅଧିକାରୀ (ଏଏସ୍ଆଇ) ସୋମନାଥ ମହାନ୍ତିଙ୍କୁ ପୁରସ୍କୃତ କରାଯାଇଛି। ବୁଧବାର କେନ୍ଦ୍ରୀୟ ଶିଳ୍ପ ନିରାପତ୍ତା ବାହିନୀ (ସିଆଇଏସ୍ଏଫ୍) ଏହାର ଟ୍ବିଟରରେ ସୋମନାଥଙ୍କୁ ପୁରସ୍କୃତ କରାଯାଇଥିବା ନେଇ ଉଲ୍ଲେଖ କରିଛି। ସୋମନାଥଙ୍କ କାର୍ଯ୍ୟ ପାଇଁ ତାଙ୍କୁ ଦଣ୍ଡିତ କରାଯାଇଥିବା ନେଇ ଭୁଲ୍ ରିପୋର୍ଟ କେତେକ ଗଣମାଧ୍ୟମରେ ପ୍ରକାଶ ପାଇଥିବାବେଳେ ସିଆଇଏସ୍ଏଫ୍ ଏହା ଉପରେ ସ୍ପଷ୍ଟୀକରଣ ଦେଇଛି। ସିଆଇଏସ୍ଏଫ୍ କହିଛି ଯେ ସୋମନାଥଙ୍କ ଦୃଷ୍ଟାନ୍ତମୂଳକ ବୃତ୍ତିଗତ କାର୍ଯ୍ୟ ଲାଗି ତାଙ୍କୁ ପୁରସ୍କୃତ କରାଯାଇଛି। ତାଙ୍କ ଉପରେ କୌଣସି ପ୍ରକାର ଦଣ୍ଡବିଧାନ କରାଯାଇ ନାହିଁ। ତେବେ ଗଣମାଧ୍ୟମରେ ତାଙ୍କୁ କହିବାରୁ ନିବୃତ୍ତ ରଖିବା ଲାଗି ତାଙ୍କ ମୋବାଇଲ ଫୋନକୁ ଜବତ କରାଯାଇଥିଲା। ସୂଚନାଯୋଗ୍ୟ ଗତ ୨୧ ତାରିଖରେ ହିନ୍ଦୀ ସିନେମା ‘ଟାଇଗର-୩’ ସୁଟିଂ ପାଇଁ ରୁଷ୍ ଯିବା ଲାଗି ସଲମାନ୍, ଅଭିନେତ୍ରୀ କ୍ୟାଟ୍ରିନା କୈଫ ଓ ଇମ୍ରାନ ହାସ୍ମି ମୁମ୍ବଇ ବିମାନ ବନ୍ଦରରେ ପହଞ୍ଚିଥିଲେ। ଏହି ସମୟରେ ସୋମନାଥ ସଲମାନଙ୍କୁ ଅଟକାଇବା ପୂର୍ବକ ସୁରକ୍ଷା ଚେକପଏଣ୍ଟର ଅନୁମୋଦନ (କ୍ଲିୟରାନ୍ସ) ପାଇଁ କହିଥିଲେ। ସଲମାନ୍ ଯବାନଙ୍କ ନିର୍ଦେଶକୁ ସମ୍ମାନ ଜଣାଇ ପଛକୁ ଫେରି ଯାତ୍ରୀଙ୍କ ଧାଡ଼ିରେ ଆସି ତନଖି ପରେ ବିମାନ ଅଭିମୁଖେ ଯାତ୍ରା କରିଥିଲେ। ସୋମନାଥଙ୍କ ଏପରି କାର୍ଯ୍ୟ ଗଣମାଧ୍ୟମରେ ଚର୍ଚ୍ଚାର ବିଷୟ ହୋଇଥିଲା।
Popular Categories
Previous article
Next article