ଚୌଦ୍ୱାର: କରୋନା ମହାମାରୀ ପାଇଁ ଗତ ୨ବର୍ଷ ଧରି ବନ୍ଦଥିବା ଶନିଯାତ୍ରା ଚଳିତ ବର୍ଷ ଧୁମଧାମରେ ପାଳିତ ହେଉଛି । ଗ୍ରହରାଜଙ୍କ ଜନ୍ମଦିବସ ଅବସରରେ ଅଞ୍ଚଳର ବିଭିନ୍ନ ଶନି ମନ୍ଦିରରେ ଭିଡ଼ ଲାଗିବା ସହିତ ଭୋରରୁ ଶ୍ରଦ୍ଧାଳୁମାନେ ପୋଖରୀରୁ କଳସରେ ପବିତ୍ର ଜଳଆଣି ଶନିଦେବଙ୍କ ମସ୍ତକରେ ଲାଗି କରିଥିଲେ । ଶନିଦେବଙ୍କ ନିକଟରେ ଦୀପଦାନ ସହିତ ସାରାଦିନ ବ୍ୟାପି ମହାଯଜ୍ଞ ଅନୁଷ୍ଠିତ ହୋଇଥିଲା । ପୌରପାଳିକା ୪ନମ୍ବର ୱାର୍ଡ଼ ଅନ୍ତର୍ଗତ ବେଉରା ସାହିସ୍ଥିତ ବୁଢ଼ା ଶନିଙ୍କ ପୀଠରେ ଭୋରରୁ ହଜାର ହଜାର ସଂଖ୍ୟାରେ ଶ୍ରଦ୍ଧାଳୁ ଲମ୍ବା ଧାଡ଼ିରେ ଯାଇ ଶନିଦେବଙ୍କ ମସ୍ତକରେ ଜଳଲାଗି କରିବା ସହିତ ମାନସିକ ପୂରଣ ପାଇଁ ଦୀପଦାନ ଓ ଭୋଗରାଗ କରିଥିଲେ । ପୀଠରେ ସାରାଦିନ ଧରି ମହାଯଜ୍ଞ ଅନୁଷ୍ଠିତ ହେବା ସହିତ ନାମ ସଂକୀର୍ତ୍ତନ ଓ ପ୍ରସାଦ ବିତରଣ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ସଂଧ୍ୟାରେ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହୋଇଥିଲା । ଅନୁରୂପ ଭାବେ କପାଳେଶ୍ୱର ଶନି ମନ୍ଦିର, ଚୌଦ୍ୱାର ଯାତ୍ରା ପଡ଼ିଆ ନିକଟ ଶନି ମନ୍ଦିର, ୧୭ ନମ୍ବର ୱାର୍ଡ଼ ନୂଆସାହି ଶନି ମନ୍ଦିର, ନଖରା ପଞ୍ଚାୟତ ଚାଞ୍ଚୋ ଗ୍ରାମର ଶନିମନ୍ଦିର, ଆଗ୍ରାହାଟ ଶନିଦେବ ମନ୍ଦିର, ଶାଳଗାଁ ପଞ୍ଚାୟତ ନୂଆଗାଁ ଓ କୟଳପଡ଼ା ଡିହସାହି ଶନି ମନ୍ଦିର ଆଦିରେ ରୀତିନୀତିରେ ପୂଜାର୍ଚ୍ଚନା ଓ ମେଳା ଅନୁଷ୍ଠିତ ହୋଇଥିବା ଜଣା ପଡ଼ିଛି ।
Comments are closed.