ଭବାନୀପାଟଣା: କଳାହାଣ୍ଡି ଜିଲ୍ଲାର କେତେକ ଅଞ୍ଚଳରେ ଚାଷୀଙ୍କ ପାଇଁ କାଳ ସାଜିଛି ଚକଡା ପୋକ । ଚକଡା ଓ ଅନ୍ୟ ପୋକ ଲାଗି ୧୩ଟି ବ୍ଲକର ପ୍ରାୟ ୨ ହଜାର ହେକ୍ଟର ଧାନ ଓ କପା ଚାଷ ନଷ୍ଟ ହୋଇଥିବା ଅଭିଯୋଗ ହୋଇଛି । ଫସଲ ନଷ୍ଟ ହେବା ପରେ ଚାଷୀର ଚିନ୍ତା ବଢିଯାଇଛି । ସ୍ଥିତି କ୍ରମଶଃ ସଙ୍ଗୀନ ହେବା ସହିତ ପ୍ରଶାସନର ଉଦାସୀନତା ଚାଷୀ କୁଳକୁ ହତାଶ କରିଛି। ତେଣୁ ଏହାକୁ ନେଇ ରାଜରାସ୍ତାକୁ ଓହ୍ଲାଇଛନ୍ତି ଚାଷୀ ।
ପୂର୍ବରୁ ଏଭଳି ସମସ୍ୟାକୁ ନେଇ ଅଭିଯୋଗ ହୋଇଥିଲେ ପ୍ରଶାସନ ପକ୍ଷରୁ କୌଣସି ପଦକ୍ଷେପ ନିଆ ଯାଇନଥିଲା। ପୋକମରା ଔଷଧ କିଣି କ୍ଷେତରେ ପକାଇବାକୁ ପରାମର୍ଶ ଦେଇ ପ୍ରଶାସନ ଚୁପ୍ ବସିଥିଲା ବୋଲି ଅଭିଯୋଗ ହୋଇଥିଲା। ଚାଷୀମାନେ ଔଷଧ କିଣି କ୍ଷେତରେ ସିଞ୍ଚନ କରିଥିଲେ ମଧ୍ୟ ପୋକ ମରିବା ବଦଳରେ ସେମାନଙ୍କ ପ୍ରାଦୁର୍ଭାବ ବଢି ଯାଇଥିଲା। ଫଳରେ ଚାହୁଁଚାହୁଁ ଚକଡା ପୋକ ଲାଗି ୨ ହଜାରରୁ ଅଧିକ ଫସଲ ନଷ୍ଟ ହୋଇଛି । ଯାହାକୁ ନେଇ ଚାଷୀଙ୍କ ମନରେ ଅସନ୍ତୋଷ ସୃଷ୍ଟି ହୋଇଛି । ଏଭଳି ସମସ୍ୟାକୁ ନେଇ ଗତ ବର୍ଷ ବିଭିନ୍ନ ସ୍ଥାନରେ ବିଭିନ୍ନ ସମୟରେ ଅନେକ ଚାଷୀ ଆତ୍ମହତ୍ୟା କରିଥିଲେ ।