କୋଚିଂ ସେଣ୍ଟରରୁ ଟଙ୍କା ଫେରସ୍ତ ପାଇଲେ ୬୦୦ରୁ ଅଧିକ ପରୀକ୍ଷାର୍ଥୀ ଏବଂ ଛାତ୍ରଛାତ୍ରୀ

ଡେସ୍କ: ଶିକ୍ଷା କ୍ଷେତ୍ରରେ ଆଶାୟୀ ଓ ଛାତ୍ରଛାତ୍ରୀଙ୍କ ପାଇଁ କେନ୍ଦ୍ର ସରକାର କୋଚିଂ ସେଣ୍ଟରରୁ ଟଙ୍କା ଫେରସ୍ତ ଜରିଆରେ ୧.୫୬ କୋଟି ଟଙ୍କାର ସହାୟତା ରାଶି ହାସଲ କରିଥିବା ଜଣାପଡିଛି। ଖାଉଟି ବ୍ୟାପାର ବିଭାଗ ଶିକ୍ଷା କ୍ଷେତ୍ରରେ ୬୦୦ରୁ ଅଧିକ ପରୀକ୍ଷାର୍ଥୀ ଏବଂ ଛାତ୍ରଛାତ୍ରୀଙ୍କ ପାଇଁ ସଫଳତାର ସହ ଏହି ଫେରସ୍ତ ହାସଲ କରିଛି। ସିଭିଲ୍ ସର୍ଭିସ୍, ଇଞ୍ଜିନିୟରିଂ ପାଠ୍ୟକ୍ରମ ଏବଂ ଅନ୍ୟାନ୍ୟ ପାଠ୍ୟକ୍ରମ ପାଇଁ କୋଚିଂ ସେଣ୍ଟରରେ ନାମ ଲେଖାଇଥିବା ଏହି ଛାତ୍ରଛାତ୍ରୀମାନେ ପୂର୍ବରୁ କୋଚିଂ ଅନୁଷ୍ଠାନଗୁଡ଼ିକ ଦ୍ୱାରା ଧାର୍ଯ୍ୟ କରାଯାଇଥିବା ସର୍ତ୍ତାବଳୀ ପାଳନ କରିବା ସତ୍ତ୍ୱେ ଟଙ୍କା ଫେରସ୍ତ ପାଇବାରୁ ବଞ୍ଚିତ ହୋଇଥିଲେ। ଜାତୀୟ ଉପଭୋକ୍ତା ହେଲ୍ପଲାଇନ ମାଧ୍ୟମରେ ଛାତ୍ରଛାତ୍ରୀମାନେ ଦାଖଲ କରିଥିବା ଅଭିଯୋଗ ମାଧ୍ୟମରେ ଏହି ଫେରସ୍ତ ସମ୍ଭବ ହୋଇପାରିଛି। ଖାଉଟି ବ୍ୟାପାର, ଖାଦ୍ୟ ଓ ସାଧାରଣ ବଣ୍ଟନ ମନ୍ତ୍ରଣାଳୟ କହିଛି ଯେ ବିଭାଗର ତ୍ୱରିତ ପଦକ୍ଷେପ ଛାତ୍ରଛାତ୍ରୀଙ୍କୁ ଅସମ୍ପୂର୍ଣ୍ଣ ସେବା, ବିଳମ୍ବିତ କ୍ଲାସ କିମ୍ବା ବାତିଲ ହୋଇଥିବା ପାଠ୍ୟକ୍ରମ ପାଇଁ କ୍ଷତିପୂରଣ ପାଇବାରେ ସାହାଯ୍ୟ କରିଛି।

ଖାଉଟି ବ୍ୟାପାର ବିଭାଗ ପକ୍ଷରୁ ସମସ୍ତ କୋଚିଂ ସେଣ୍ଟରକୁ ଛାତ୍ରଛାତ୍ରୀ କେନ୍ଦ୍ରୀତ ଆଭିମୁଖ୍ୟ ଅବଲମ୍ବନ କରିବାକୁ ନିର୍ଦ୍ଦେଶ ଦିଆଯାଇଛି, ଯେଉଁଥିରେ ଛାତ୍ରଛାତ୍ରୀଙ୍କ ଆର୍ଥିକ ସ୍ୱାର୍ଥ ରକ୍ଷା ପାଇଁ ସ୍ପଷ୍ଟ, ସ୍ୱଚ୍ଛ ଫେରସ୍ତ ନୀତି ବାଧ୍ୟତାମୂଳକ କରାଯାଇଛି। ବୈଧ ଫେରସ୍ତ ଦାବିକୁ ପ୍ରତ୍ୟାଖ୍ୟାନ କରିବାର ଅନ୍ୟାୟ ପ୍ରଥାକୁ ଆଉ ବରଦାସ୍ତ କରାଯିବ ନାହିଁ ବୋଲି ବିଭାଗ ସ୍ପଷ୍ଟ କରିବା ସହ ଶିକ୍ଷାନୁଷ୍ଠାନଗୁଡ଼ିକୁ ଉପଭୋକ୍ତା ଅଧିକାର ବଜାୟ ରଖିବାକୁ ଅନୁରୋଧ କରିଛି।