ବୌଦ୍ଧ: ବୌଦ୍ଧ ସହର ମହାନଦୀ ପୋଲ ଅପରପାର୍ଶ୍ବ କିଆକଟା ଠାରେ ଗତକାଲି ବିଳମ୍ବିତ ରାତ୍ରିରେ ରାସ୍ତାପାର୍ଶ୍ବରେ ଛିଡ଼ା ହୋଇଥିବା ଏକ ଇନୋଭା କାର୍ ଉପରେ ଯାତ୍ରୀବାହୀ ବସ୍ ଚଢ଼ିଯିବା ଫଳରେ କାର୍ରେ ବସିଥିବା ୨ ଜଣଙ୍କର ମୃତ୍ୟୁ ହୋଇଥିବା ବେଳେ ୪ ଜଣଙ୍କୁ ଗୁରୁତର ଅବସ୍ଥାରେ ବୁର୍ଲା ସ୍ଥାନାନ୍ତର କରାଯାଇଛି। ଏହି ଦୁର୍ଘଟଣାରେ ୨୫ ଜଣ ବସ୍ଯାତ୍ରୀ ଆହତ ହୋଇଛନ୍ତି। ମୃତକ ୨ ଜଣ ହେଲେ ଭବାନୀପାଟଣାର ଦନାର୍ଦନ ମହାପାତ୍ର ଏବଂ ଇନୋଭାର ଡ୍ରାଇଭର ବଲାଙ୍ଗୀରର ଶ୍ରୀକୃଷ୍ଣ ପଟେଲ। ମିଳିଥିବା ସୂଚନା ମୁତାବକ ଭବାନୀପାଟଣାର ଏକ ପରିବାରର ସଦସ୍ୟମାନେ ଅନୁଗୁଳ ଜିଲା କାମାକ୍ଷାନଗରରୁ ଏକ ନିର୍ବନ୍ଧ କାମ ସାରି ଫେରୁଥିବା ସମୟରେ କିଆକଟାଛକ ଠାରେ ଅଟକିଥିଲେ। ଗାଡ଼ିରେ ଥିବା ମହିଳାମାନେ ତଳକୁ ଓହ୍ଲାଇ ପରିସ୍ରା କରିବାକୁ ଯାଇଥିବା ବେଳେ ବୁର୍ଲାରୁ ବ୍ରହ୍ମପୁରକୁ ଯାଉଥିବା ଘରୋଇ ବସ୍ ବୃନ୍ଦାବନ (ଓଡି ୦୨ ଏକେ ୮୧୮୮) ଦ୍ରୁତ ଗତିରେ ଆସି ଛିଡ଼ା ହୋଇଥିବା କାର ଉପରେ ଚଢ଼ିଯିବା ସହ ଓଲଟି ପଡ଼ିଥିଲା। ଏହି ଦୁର୍ଘଟଣାରେ କାରରେ ବସିଥିବା ୨ ଜଣଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିଲା। ଅନ୍ୟ ୮ ଜଣ ଗୁରୁତର ଆହତ ହୋଇଛନ୍ତି। ବସଟି ଓଲଟି ଯିବା ଫଳରେ ବସରେ ବସିଥିବା ୨୧ରୁ ଉର୍ଦ୍ଧ ଯାତ୍ରୀ ଆହତ ହୋଇଛନ୍ତି। ଖବର ପାଇ ବୌଦ୍ଧ ଅଗ୍ନିଶମ ବାହିନୀ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ଆହତମାନଙ୍କୁ ଉଦ୍ଧାର କରି ଡାକ୍ତରଖାନାକୁ ଆଣିଥିଲେ। ଆହତମାନଙ୍କୁ ବୌଦ୍ଧ ଜିଲା ମୁଖ୍ୟ ଚିକିତ୍ସାଳୟରେ ଚିକିତ୍ସା କରାଯାଉଛି। କିଆକଟା ପୁଲିସ ଘଟଣାର ତଦନ୍ତ କରୁଛି।
Comments are closed.