ମାତୃତ୍ବକାଳୀନ ଛୁଟିରେ ଠିକା ଓ ସ୍ଥାୟୀ କର୍ମଚାରୀଙ୍କ ମଧ୍ୟରେ ପାତରଅନ୍ତର ହେବ ନାହିଁ

କଲକାତା: ମାତୃତ୍ବକାଳୀନ ଛୁଟି ପ୍ରଦାନ କ୍ଷେତ୍ରରେ ଠିକା ଓ ସ୍ଥାୟୀ କର୍ମଚାରୀଙ୍କ କ୍ଷେତ୍ରରେ କୌଣସି ପ୍ରକାର ପାତରଅନ୍ତର କରାଯାଇପାରିବ ନାହିଁ ବୋଲି କୋଲକାତା ଉଚ୍ଚ ନ୍ୟାୟାଳୟ କହିଛନ୍ତି। ମାତୃତ୍ବ ଛୁଟି ପ୍ରଦାନରେ କୌଣସି ପ୍ରକାର ପାତରଅନ୍ତର କରାଗଲେ ଏହା ମାଟରନିଟି ବେନିଫିଟ୍ ଆକ୍ଟ ୧୯୬୧ର ଉଲ୍ଲଙ୍ଘନ କରିଥାଏ। କୌଣସି ଠିକା କର୍ମଚାରୀଙ୍କୁ ମାତୃତ୍ବ ଛୁଟି ପ୍ରଦାନ ଲାଗି ମନା କରାଯିବା ଦ୍ବାରା ସମ୍ବିଧାନର ଧାରା ୧୪ର ଉଲ୍ଲଙ୍ଘନ ହୋଇଥାଏ। ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ (ଆରବିଆଇ)ରେ କାର୍ଯ୍ୟନିର୍ବାହୀ ଇଣ୍ଟର୍ଣ୍ଣ ଭାବେ କାର୍ଯ୍ୟ କରୁଥିବା ଜଣେ କର୍ମଚାରୀଙ୍କୁ ମାତୃତ୍ବକାଳୀନ ଛୁଟି ପ୍ରଦାନ ଲାଗି କର୍ତ୍ତୃପକ୍ଷ ମନା କରିବାକୁ ନେଇ ପୀଡିତା ଅଦାଲତଙ୍କ ଦ୍ବାରସ୍ଥ ହୋଇଥିଲେ। ଆବେଦନର ଶୁଣାଣି କରି ଉଚ୍ଚ ନ୍ୟାୟାଳୟ ବିଚାରପତି ରାଜା ବାସୁ ଚୌଧୁରୀ ଶୀର୍ଷ ବ୍ୟାଙ୍କକୁ ପୀଡିତା କର୍ମଚାରୀଙ୍କୁ ମାତୃତ୍ବକାଳୀନ ବାବଦ ସମସ୍ତ ପ୍ରାପ୍ୟ ପ୍ରଦାନ ଲାଗି ନିର୍ଦେଶ ଦେଇଛନ୍ତି। ନିୟମ ଅନୁଯାୟୀ ସନ୍ତାନ ଜନ୍ମ ଦେବା ଲାଗି ପ୍ରତ୍ୟେକ ମହିଳା କର୍ମଚାରୀ ୬ମାସ ସବୈତନିକ ଛୁଟି ପାଇବାକୁ ହକ୍‌ଦାର।