ପିପିଲି : ପିପିଲି ବ୍ଲକ ନୂଆଶାସନ ପଞ୍ଚାୟତର ସରପଞ୍ଚ ପଦବୀ ପାଇଁ ଆସନ୍ତା ୨୪ ତାରିଖରେ ଉପନିର୍ବାଚନ ଅନୁଷ୍ଠିତ ହେବାକୁ ଥିବା ବେଳେ ଆଜି ସଂନ୍ଧ୍ୟାରେ ପ୍ରଚାର ଶେଷ ହୋଇଛି । ଏହି ନିର୍ବାଚନରେ ବିଜେଡି ସମର୍ଥିତ ପ୍ରାର୍ଥୀ ଡାକ୍ତର ଚିନ୍ମୟ ମହାପାତ୍ର, ବିଜେପି ସମର୍ଥିତ ପ୍ରାର୍ଥୀ ସୌମ୍ୟକାନ୍ତ ଦାଶ ଓ କଂଗ୍ରେସ ସମର୍ଥିତ ପ୍ରାର୍ଥୀ ପ୍ରଶାନ୍ତ କୁମାର ପ୍ରଧାନ ପ୍ରତିଦ୍ୱନ୍ଦିତା କରୁଛନ୍ତି । ତେବେ ସୌମ୍ୟକାନ୍ତ ଓ ଚିନ୍ମୟଙ୍କ ମଧ୍ୟରେ କଡା ଟକ୍କ୍ର ହେବ ବୋଲି ସମୀକ୍ଷାରୁ ଜଣାପଡିଛି । ଏହି ପଞ୍ଚାୟତର ୧୨ଟି ୱାର୍ଡରେ ୨୫୬୯ ପୁରୁଷ ଓ ୨୧୬୨ ମହିଳା ଭୋଟରଙ୍କୁ ମିଶାଇ ମୋଟ୍ ୪୭୩୧ ଜଣ ଭୋଟର୨୪ ତାରିଖରେ ମୋଟ୍ ୧୨ଟି ବୁଥ୍ରେ ମତଦାନ କରିବାକୁ ଥିବା ବେଳେ ସକାଳ ୭ଟାରୁ ୧୨ଟା ପର୍ଯ୍ୟନ୍ତ ଭୋଟ୍ ଗ୍ରହଣ କରାଯିବ । ୧୨ଟି ବୁଥ୍ରେ ୧୨ଜଣ ପ୍ରିଜାଇଡିଂ ଅଫିସର, ୧୨ଜଣ ପ୍ରଥମ ପୁଲିଂ ଅଫିସର ଓ ୧୨ଜଣ ଦ୍ୱିତୀୟ ପୁଲିଂ ଅଫିସର ଓ ପୁଲିସ କର୍ମଚାରୀଙ୍କୁ ନିୟୋଜିତ କରାଯାଇଛି । ନୂଆଶାସନ ପଞ୍ଚାୟତରେ ପୁଲିସ ପେଟ୍ରୋଲିଂକୁ ଅଧିକ କଡାକଡି କରାଯାଇଥିବା ବେଳେ ଅବାଧ ଓ ନିରପେକ୍ଷ ନିର୍ବାଚନ କରିବା ପାଇଁ ପୁଲିସ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଥିବା ସଂପର୍କରେ ଆଇଆଇସି ଗୌରାଙ୍ଗ ଚରଣ ପୃଷ୍ଠି ସୂଚନା ଦେଇଛନ୍ତି ।
ଏଠାରେ ସୂଚନା ଥାଉକି, ଗତ ୨୦୧୭ରେ ଅନୁଷ୍ଠିତ ପଞ୍ଚାୟତ ନିର୍ବାଚନରେ ନୂଆଶାସନ ପଞ୍ଚାୟତରୁ ପ୍ରଫୁଲ୍ଲ କୁମାର ମେକାପ ସରପଞ୍ଚ ଭାବେ ବିଜୟୀ ହୋଇଥିଲେ । ତେବେ ପ୍ରଫୁଲ୍ଲଙ୍କ ୩ଟି ସନ୍ତାନ ଥିବା ଦର୍ଶାଇ ତାଙ୍କ ନିକଟତମ ପ୍ରତିଦ୍ୱନ୍ଦୀ ସୌମ୍ୟକାନ୍ତ ଦାଶ ଅଦାଲତରେ ମାମଲା ରୁଜୁ କରିଥିଲେ । ଉକ୍ତ ମାମଲାର ବିଚାର କରି ଅଦାଲତ ଶ୍ରୀମେକାପଙ୍କ ସରପଞ୍ଚ ପଦବୀକୁ ଅସିଦ୍ଧ ଘୋଷଣା କରିବା ପରେ ସରପଞ୍ଚ ପଦବୀ ଖାଲି ପଡିଥିଲା ।
