ବୁର୍ଲା: ବୁର୍ଲା ବିଷ୍ଣୁ ମନ୍ଦିର ପଡ଼ା କେନାଲ ଘାଟରେ ଗାଧୋଉଥିବା ବେଳେ ଭାସିଯାଇ ଜଣେ ନାବାଳକ ନିଖୋଜ ହୋଇଯାଇଛନ୍ତି। ନିଖୋଜ ନାବାଳକଙ୍କ ନାଁ ପ୍ରକାଶ ରାୟ(୧୪) ବୋଲି ଜଣାପଡ଼ିଛି। ସ୍ଥାନୀୟ ବାସିନ୍ଦାଙ୍କ ସହିତ ବୁର୍ଲା ଅଗ୍ନିଶମ ବାହିନୀ ବୋଟ୍ ସହାୟତାରେ ଖୋଜାଖୋଜି କରିଥିଲେ ମଧ୍ୟ ବର୍ତ୍ତମାନ ସୁଦ୍ଧା ତାଙ୍କର କୌଣସି ଖୋଜ ଖବର ମିଳିପାରି ନାହିଁ।
ସୂଚନା ମୁତାବକ, ଦିନ ମଜୁରିଆ ବ୍ରିଜ ମୋହନ ରାୟଙ୍କ ପୁଅ ପ୍ରକାଶ ଶୁକ୍ରବାର ଅପରାହ୍ନ ସମୟରେ ସ୍କୁଲରୁ ଘରକୁ ଫେରିଥିଲେ। ଏହାର କିଛି ସମୟ ପରେ ତାଙ୍କର ଜଣେ ସାଙ୍ଗ ତାଙ୍କୁ କେନାଲକୁ ଗାଧୋଇଯିବା ପାଇଁ ଡାକି ନେଇଥିଲେ। ଉଭୟେ ବିଷ୍ଣୁ ମନ୍ଦିର ପଡ଼ା ଘାଟକୁ ଗାଧୋଇବାକୁ ଯାଇଥିଲେ। କିଛି ସମୟ ଗାଧୋଇବା ପରେ ପ୍ରକାଶ ପାଣିରେ ଭାସି ଯାଇଥିଲେ। ସେହି ସମୟରେ ବଞ୍ଚିବା ପାଇଁ ନିକଟରେ ଥିବା ସାଙ୍ଗର ଗାମୁଛାକୁ ଟାଣି ନେଇଥିଲେ। ନିକଟରେ ଥିବା ଜଣେ ଛୋଟ ଝିଅ ଗାମୁଛାକୁ ଟାଣି ପ୍ରକାଶଙ୍କୁ ବଞ୍ଚାଇବାକୁ ଉଦ୍ୟମ କରିଥିଲେ। ମାତ୍ର ପ୍ରଖର ସ୍ରୋତ ରହିଥିବା ଯୋଗୁଁ ଝିଅ ଜଣକ ତାଙ୍କୁ ଟାଣି ପାରି ନ ଥିଲେ। ଏହାପରେ ପ୍ରକାଶ ପାଣିରେ ଭାସି ଯାଇଥିଲେ। ପରେ ବୁର୍ଲା ଅଗ୍ନିଶମ ବିଭାଗ ଏବଂ ପୁଲିସକୁ ଅବଗତ କରାଯାଇଥିଲା। ସ୍ଥାନୀୟ ବାସିନ୍ଦା ପାଣିକୁ ଯାଇ ଖୋଜାଖୋଜି କରିଥିବା ବେଳେ ଅଗ୍ନିଶମ ବାହିନୀ ବୋଟ୍ରେ ପ୍ରକାଶକୁ ଖୋଜିବାକୁ ଚେଷ୍ଟା କରିଥିଲେ। ମାତ୍ର ସନ୍ଧ୍ୟା ୫ଟା ସୁଦ୍ଧା କୌଣସି ଖୋଜଖବର ମିଳି ପାରି ନ ଥିବା ସୂଚନା ହସ୍ତଗତ ହୋଇଛି। ପ୍ରକାଶ ବୁର୍ଲା ସରକାରୀ ବାଳକ ଉଚ୍ଚ ବିଦ୍ୟାଳୟର ଛାତ୍ର।
