ଦ୍ବିତୀୟ ପର୍ଯ୍ୟାୟ ଲକ୍-ଡାଉନ୍ କଡ଼ା କଟକଣାରେ ବ୍ରିଟେନ୍ରେ ଚାଲିଛି। ସେଠା ପ୍ରଶାସନ ଅନୁସାରେ, ସ୍ଥାନୀୟ ଲୋକଙ୍କ ଅମାନିଆ ପ୍ରକୃତି ସହ କରୋନାର ବର୍ଦ୍ଧିତ ସଂଖ୍ୟା ପାଇଁ ଏଭଳି ପଦକ୍ଷେପ ନିଆଯାଇଛି। ବ୍ରିଟେନ୍ରେ କିଛିଦିନ ତଳେ ଏକ ସର୍ବେକ୍ଷଣ ହୋଇଥିଲା। ଏଇ ସମୟରେ ପିଲାଠାରୁ ବୟସ୍କ କିଭଳି ସମୟ ଅତିବାହିତ କରୁଛନ୍ତି, ତାହା ଅନୁଧ୍ୟାନ କରାଯାଇଥିଲା। ଛାତ୍ରଛାତ୍ରୀଙ୍କର ଅନ୍ଲାଇନ୍ କ୍ଲାସ୍ରେ ପୂର୍ବଭଳି ଆଗ୍ରହ ନାହିଁ। ଘରେ ବନ୍ଦ ରହି ସେମାନଙ୍କ ମାନସିକ ସ୍ଥିତି ମଧ୍ୟ ପ୍ରଭାବିତ ହେଲାଣି। ଅନ୍ୟପାଖେ ପିଲାଙ୍କୁ ଅନ୍ଲାଇନ୍ ଗେମ୍ ସହ ଚିତ୍ର ଆଙ୍କିବାକୁ ପରାମର୍ଶ ବାପା-ମା’ ଦେଉଛନ୍ତି। ଯୁବପିଢ଼ି ‘ୱାର୍କ ଫ୍ରମ୍ ହୋମ୍’ରେ ବ୍ୟସ୍ତ ଥିବାବେଳେ ବୟସ୍କପିଢ଼ି ଏଇ ସମୟରେ ‘କ୍ରସ୍ ୱାର୍ଡ ପଜଲ୍’ ଖେଳୁଥିବାର ପ୍ରକାଶ। ବ୍ରିଟେନ୍ରେ ଘରେଘରେ ଏବେ ଲୋକେ ଏସବୁ ପଜଲ୍ ଖେଳି ସମୟ ଅତିବାହିତ କରୁଛନ୍ତି। କ୍ରସ୍ ୱାର୍ଡ ପଜଲ୍ ଅନ୍ଲାଇନ୍ରେ ଖେଳୁଥିବାର ବୟସ୍କ ବନ୍ଧୁମାନେ ଗୋଟିଏ ସମୟରେ ଏକାଠି ହୋଇ ଖେଳୁଛନ୍ତି। ଶାରୀରିକ ଭାବେ ସେମାନେ ପରସ୍ପରଠାରୁ ଦୂରରେ ଥିବାବେଳେ ମନ କିନ୍ତୁ ଏଇ ଅନ୍-ଲାଇନ୍ ଗେମ୍ ହିଁ ମିଶାଇ ଦେଉଛି।
– ଲଣ୍ଡନ ବାସିନ୍ଦା ୭୨ ବର୍ଷୀୟା ମାର୍ଗାରେଟ୍ କହିଛନ୍ତି, ଏ ସମୟ କିଭଳି ଶୀଘ୍ର ଅତିବାହିତ ହେବ, ତାହା ହିଁ ଈଶ୍ବରଙ୍କ ପାଖେ ପ୍ରାର୍ଥନା। ସେ ମଧ୍ୟ କ୍ରସ୍ ୱାର୍ଡ ପଜଲ୍ ଖେଳି ସମୟ ଅତିବାହିତ କରୁଥିବାବେଳେ ଏହା ତାଙ୍କୁ ଖୁବ୍ ମଜାଦାର୍ ଲାଗୁଛି।
– ବିଭିନ୍ନ ବର୍ଗର ଲୋକ ସେମାନଙ୍କ କାମ ଅନ୍ଲାଇନ୍ରେ ଚଲାଇଥିବାବେଳେ ଏଇ ସମୟରେ କିନ୍ତୁ ରୋଷେୟା କାମ କରୁଥିବା ବ୍ୟକ୍ତିମାନେ ଅଧିକ ହଇରାଣ ହେଉଥିବାର ଜଣାପଡ଼ିଛି। ବ୍ରିଟେନ୍ ପରି ଧନୀ ରାଷ୍ଟ୍ରରେ ସମ୍ଭ୍ରାନ୍ତ ବର୍ଗର ଲୋକ ରୋଷେୟା ରଖିବାକୁ ପସନ୍ଦ କରନ୍ତି। ସେଠାରେ ରୋଷେୟାଙ୍କ ପାଉଣା ମଧ୍ୟ କିଛି କମ୍ ନୁହେଁ। ହେଲେ ଏଇ ଦ୍ବିତୀୟ ପର୍ଯ୍ୟାୟ ଲକ୍-ଡାଉନ୍ରେ ସେମାନେ ପୁଣି ହାତ ବାନ୍ଧି ବାସିଛନ୍ତି।
