ବ୍ରହ୍ମପୁର : ସାମୁଦ୍ରିକ ଝଡ଼ ’ତିତଲି’ ପ୍ରଭାବରେ ଗଞ୍ଜାମ ଓ ଗଜପତି ଜିଲ୍ଲାରେ ପ୍ରବଳ ବର୍ଷା ଲାଗି ରହିଛି । ଲଗାଣ ବର୍ଷା ଯୋଗୁଁ ଗଞ୍ଜାମ ଜିଲ୍ଲା ସୋରଡା ଗାଜଲବାଡି ପଞ୍ଚାୟତ ପଙ୍କାଳସାହୀ ଗାଁରେ ବନ୍ୟା ଜଳ ପ୍ରବେଶ କରିଛି । ଏହି ବନ୍ୟା ପାଣିରେ ଏକ ଘର ଭାସିଯିବାରୁ ସେଥିରେ ଥିବା ୬ ଜଣ ଲୋକ ନିଖୋଜ ହୋଇଯାଇଛିନ୍ତି । ପଙ୍କାଳସାହୀ ଗାଁ ନିକଟ ଅଡାଙ୍ଗି ନଦୀରେ ଘରଟି ଭସିଯାଇଥିବା ସୂଚନା ମିଳିଛି । ନିଖୋଜଙ୍କ ମଧ୍ୟରେ ଗୋଟିଏ ପରିବାରର ୪ ସଦସ୍ୟ, ସ୍ୱାମୀ-ସ୍ତ୍ରୀ ଓ ପୁଅ-ବୋହୂ ଥିବା ବେଳେ ସେହି ଘରେ ଆଶ୍ରୟ ନେଇଥିବା ଅନ୍ୟ ୨ ଜଣ ଲୋକ ମଧ୍ୟ ନିଖୋଜ ହୋଇଯାଇଛନ୍ତି । ଗୁରୁବାର ପୂର୍ବାହ୍ମରେ ଏହି ଅଘଟଣ ଘଟିଥିବା ବେଳେ ଦିନ ୧୨ଟାରୁ ନିଖୋଜ ସମସ୍ତଙ୍କୁ ଉଦ୍ଧାର ଲାଗି ପ୍ରୟାସ ଜାରି ରହିଛି । କିନ୍ତୁ ପ୍ରବଳ ବର୍ଷା ଯୋଗୁଁ ଉଦ୍ଧାର କାର୍ଯ୍ୟରେ ବାଧା ଉପୁଜିଛି ବୋଲି ଗଞ୍ଜାମ ଜିଲ୍ଲାପାଳ ବିଜୟ କୁଲାଙ୍ଗେ କହିଛନ୍ତି । ଉଦ୍ଧାର ପାଇଁ ପ୍ରୟାସ ଜାରି ରହିଛି।