ଅନ୍ଧାରରେ ମା’ ତାରାତାରିଣୀ!

ବ୍ରହ୍ମପୁର : ଦକ୍ଷିଣ ଓଡ଼ିଶାର ଅଧିଷ୍ଠାତ୍ରୀ ଦେବୀ ମା’ ତାରାତାରିଣୀ ଅନ୍ଧାରରେ ପୂଜା ପାଉଥିବା ଅଭିଯୋଗ ହୋଇଛି। ମା’ଙ୍କ ମନ୍ଦିର ବେଢା ଓ ଗର୍ଭଗୃହରେ ୩ ଦିନ ହେଲା ବିଦ୍ୟୁତ ବିଭ୍ରାଟ ଦେଖାଦେଇଛି। ବର୍ତ୍ତମାନ ପର୍ଯ୍ୟଟନ ଋତୁ ଥିବାବେଳେ ପ୍ରତିଦିନ ଶହ ଶହ ଭକ୍ତଙ୍କ ଭିଡ଼ ଲାଗୁଛି। କିନ୍ତୁ ସନ୍ଧ୍ୟା ହେଲେ ମାଙ୍କ ମନ୍ଦିର ଅନ୍ଧକାରମୟ ହୋଇପଡୁଥିବାରୁ ଭକ୍ତଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି।ଦୁଇ ତିନି ଦିନ ହେଲା ଏଭଳି ପରିସ୍ଥିତି ସୃଷ୍ଟି ହୋଇଛି। ବିଦ୍ୟୁତ ବିଭ୍ରାଟ ଦେଖାଦେଉଥିବାବେଳେ ସେଠାରେ ଲାଗିଥିବା ସୋଲାର ପ୍ୟାନେଲ ମଧ୍ୟ କାମ କରୁନଥିବା ଜଣାପଡିଛି। ମଙ୍ଗଳବାର ସନ୍ଧ୍ୟାରେ ମନ୍ଦିର ଭିତରେ ଆଲୁଅ ନଥିବାରୁ ଭକ୍ତ ମାନେ ନିଜ ମୋବାଇଲ ଟର୍ଚ୍ଚ ପକାଇ ମା’ଙ୍କୁ ଦର୍ଶନ କରିଥିଲେ। ତିନି ଦିନ ହେଲା ଏଭଳି ପରିସ୍ଥିତି ସୃଷ୍ଟି ହୋଇଥିବା ବେଳେ ଏହାର ସ୍ଥାୟୀ ସମାଧାନ କରିବାକୁ ସାଧାରଣରେ ଦାବି ହୋଇଛି। ମା’ଙ୍କ ମନ୍ଦିର ପରିସର ଅନ୍ଧକାରକୁ ନେଇ ଭକ୍ତମାନେ ଅସନ୍ତୋଷ ପ୍ରକାଶ କରିଛନ୍ତି। ଇତିମଧ୍ୟରେ ମନ୍ଦିରରେ ଆଲୁଅ ନଥିବା ଘଟଣାକୁ ପୁରୁଷୋତ୍ତମପୁର ତହସିଲଦାର ବିନୋଦ ବେହେରା ଖଣ୍ଡନ କରିଛନ୍ତି। ମନ୍ଦିର ଗର୍ଭଗୃହ ଭିତରେ ଶୀତତାପ ନିୟନ୍ତ୍ରିତ ଯନ୍ତ୍ର ରହିଛି। ଏହାସହିତ ଫୁଲ ରଖିବା ପାଇଁ ଏକ ଫ୍ରିଜ ରହିଥିବାରୁ ଏହା ଚାଲୁହେଲେ ବେଳେବେଳେ ବିଦ୍ୟୁତ କଟିଯାଉଛି। ଆଜି ମଧ୍ୟ ସନ୍ଧ୍ୟାବେଳେ ଏଭଳି ଟ୍ରିପ୍‌ ହୋଇଥିଲା। କିଛି ସମୟ ପାଇଁ ବିଦ୍ୟୁତ କଟିଯାଇଥିଲା। ମନ୍ଦିର ବେଢାରେ ଆଲୁଅ ବ୍ୟବସ୍ଥା ଠିକ୍‌ଠାକ ରହିଥିବା ଶ୍ରୀ ବେହେରା କହିଛନ୍ତି। ଇତିମଧ୍ୟରେ ମନ୍ଦିର ବେଢାରେ ଆଲୁଅ ବ୍ୟବସ୍ଥା ତଦାରଖ ପାଇଁ ତହସିଲଦାର,ବିଦ୍ୟୁତ ବିଭାଗ ଓ ପୁଲିସ ଅଧିକାରୀ​‌ ତାରାତାରିଣୀ ମନ୍ଦିରରେ ପହଞ୍ଚିଛନ୍ତି। ମନ୍ଦିରରେ ଥିବା ସୋଲାର ପ୍ୟାନେଲକୁ ମଧ୍ୟ ବଦଳାଯିବ ବୋଲି ସୂଚନା ମିଳିଛି।