ବୌଦ୍ଧ: ଚୋରା ଗଂଜେଇ ଚାଲାଣବେଳେ ଏକ ଇଣ୍ଡିଗୋ କାର ସମେତ ଦୁଇଜଣ ଅଭିଯୁକ୍ତଙ୍କୁ ଗିରଫ କରିବାରେ ବୌଦ୍ଧ ପୁଲିସ ସଫଳ ହୋଇଛି । ସୂଚନା ମୁତାବକ ବଘିଆପଡା ଫାଣ୍ଡି ଅର୍ନ୍ତଗତ ଆଭ୍ୟନ୍ତରୀଣ ଅଞ୍ଚଳରୁ ଚୋରା ଗଂଜେଇ ଚାଲାଣ ସଂପର୍କରେ ବିଶ୍ୱସ୍ତ ସୁତ୍ରରୁ ସୂଚନା ପାଇ ବୌଦ୍ଧ ପୁଲିସର ଏକ ୬ ଜଣିଆ ଟିମ୍ ବୌଦ୍ଧ ବ୍ଲକ ଅନ୍ତର୍ଗତ ସାନଗୋଛାପଡା ଛକ ନିକଟରେ ଛକି ରହିଥିଲେ । କତମସିଂହ ପଟରୁ ବଘିଆପଡା ଆଡକୁ ଆସୁଥିବା ଏକ ଇଣ୍ଡିଗୋ ( ନମ୍ବର ଜି.ଜେ- ୨୧ଏଏ – ୬୧୨୩) କାର ଆସୁଥିବାବେଳେ ପୂର୍ବରୁ ଛକି ରହିଥିବା ପୁଲିସ ଟିମ୍ ଗାଡିକୁ ଅଟକାଇ ଯାଞ୍ଚ କରିଥିଲେ ।
ଗାଡିର ପଛ ଡିକିରେ ୩ଟି ଜରି ବସ୍ତାରେ ଗଂଜେଇ ଭର୍ତ୍ତି ହୋଇ ରହିଥିବାବେଳେ ପୁଲିସ ତାହାକୁ ଜବତ କରିବା ସହିତ ଗାଡିର ଡ୍ରାଇଭର ଅନୁଗୁଳ ଜିଲା କିଶୋରନଗର ଥାନା ଅନ୍ତର୍ଗତ ଗଜାପଥର ଗ୍ରାମର ସତ୍ୟପ୍ରିୟ ମାଝି(୨୮) ଓ ଅନ୍ୟତମ ଅଭିଯୁକ୍ତ ଅନଗୁଳ ଜିଲା ଠାକୁରଗଡ ଗ୍ରାମର ସୁଶାନ୍ତ କୁମାର ଷାଣ୍ଢକୁ ଥାନାକୁ ଆଣି ପଚରାଉଚରା କରିବାପରେ ସେମାନେ ବଘିଆପଡା କତମସିଂହ ଅଞ୍ଚଳରୁ ରେଢାଖୋଲ ପଟକୁ ବିକ୍ରୟ ପାଇଁ ଗଂଜେଇ ନେଉଥିବା ପୁଲିସ ଆଗରେ ସ୍ୱିକାର କରିଥିଲେ । ଏକଜୁକୁଟିଭ ମାଜିଷ୍ଟ୍ରେଟଙ୍କ ଉପସ୍ଥିତିରେ ଜବତ ଗଂଜେଇକୁ ଓଜନ କରାଯିବା ପରେ ୫୦ କିଲୋ ହୋଇଥିବା ପୁଲିସ ପକ୍ଷରୁ ସୂଚନା ପ୍ରଦାନ କରାଯାଇଛି । ଗଂଜେଇ ଚାଲାଣ ହେଉଥିବା କାର ସମେତ ଅଭିଯୁକ୍ତମାନଙ୍କ ନିକଟରୁ ଦୁଇଟି ମୋବାଇଲ ଫୋନକୁ ଜବତ କରି ପୁଲିସ ଉଭୟ ଅଭିଯୁକ୍ତଙ୍କୁ ଶନିବାର କୋର୍ଟ ଚାଲାଣ କରିଛି ।
Comments are closed.