ବୌଦ୍ଧ: ଫୁଲବାଣୀ ସ୍ୱତନ୍ତ୍ର ଭିଜିଲାନସ ଜଜ ସମର ବିଳାସ ବେହେରା ସୋମବାର ଏକ ଲାଞ୍ଚନେବା ମାମଲାର ବିଚାର କରି ବୌଦ୍ଧ ଖାଉଟି ଅଦାଲତର ଷ୍ଟେନୋ ଅଭିଯୁକ୍ତ ମନ୍ମଥ ଗଡନାୟକଙ୍କୁ ୩ ବର୍ଷ କାରାଦଣ୍ଡାଦେଶ ଦେବା ସହ ୫ ହଜାର ଟଙ୍କା ଜୋରିମୋନା ଆଦେଶ ପ୍ରଦାନ କରିଛନ୍ତି। ମାମଲାରୁ ପ୍ରକାଶ ଯେ, ବୌଦ୍ଧ ଜିଲାର ଜାମପାଲି ଗ୍ରାମର ସତ୍ୟ ପ୍ରଧାନ ନିଜର ଘରର ବିଦ୍ୟୁତ ବିଲ ରେଗୁଲାର ପୈଠ କରୁଥିଲେ ମଧ୍ୟ ବିଦ୍ୟୁତ ବିଭାଗ ପକ୍ଷରୁ ୪୧ ହଜାର ଟଙ୍କା ଫାଇନ କରିଥିଲେ ।
ଏହି ଟଙ୍କା ବିଦ୍ୟୁତ ବିଭାଗ ମନଇଛା ପକାଇଥିବାରୁ ଏଥିରୁ ମୁକ୍ତି ପାଇବାକୁ ଶ୍ରୀ ପ୍ରଧାନ ଖାଉଟି ଅଦାଲତର ଷ୍ଟେନୋ ମନ୍ମଥ ଗଡନାୟକଙ୍କୁ କହିବା ସହ ଏକ ମାମଲା ରୁଜୁ କରିବାକୁ କହିଥିଲେ। ମାମଲା କରିବାକୁ ଷ୍ଟେନୋ ଶ୍ରୀଗଡନାୟକ ତାଙ୍କୁ ୩୦୦୦ ଟଙ୍କା ଲାଞ୍ଚ ମାଗିଥିଲେ। ଏନେଇ ସତ୍ୟ ପ୍ରଧାନ ଭିଜିଲାନସର ଦ୍ୱାରସ୍ଥ ହୋଇଥିଲେ। ଗତ ୧୮.୩. ୨୦୨୯ରେ ଷ୍ଟେନୋ ଶ୍ରୀ ଗଡନାୟକ ୩୦୦୦ ଟଙ୍କା ଲାଞ୍ଚ ନେଉଥିବାବେଳେ ଭିଜିଲାନସ ହାତରେ ଧରାପଡିଥିଲେ।
ଏନେଇ ଭିଜିଲାନସ ପକ୍ଷରୁ ଏକ ମାମଲା ୬/୨୦୧୯ ରେ ରୁଜୁ କରି ଅଭିଯୁକ୍ତକୁ ବିଚାର ପାଇଁ କୋର୍ଟକୁ ପଠାଇଥିଲେ। ପରବର୍ତ୍ତୀ ସମୟରେ ମାମଲାଟି ଫୁଲବାଣୀ ସ୍ୱତନ୍ତ୍ର ଭିଜିଲାନସ ଜଜଙ୍କ ଅଦାଲତରେ ବିଚାର ହୋଇଥିଲା। ମାମଲାରେ ୧୦ଜଣ ସାକ୍ଷୀଙ୍କ ବୟାନକୁ ଭିତିକରି ଅଦାଲତ ସୋମବାର ଅଭିଯୁକ୍ତ ଷ୍ଟେନୋ ଶ୍ରୀ ଗଡାନାୟକଙ୍କୁ ୩ ବର୍ଷ କାରାଦଣ୍ଡାଦେଶ ଦେବା ସହ ୫ ହଜାର ଟଙ୍କା ଜୋରିମୋନା ଆଦେଶ ପ୍ରଦାନ କରିଛନ୍ତି। ଯଦି ଜୋରିମୋନା ଅର୍ଥ ଅନାଦେୟ ହୁଏ ତେବେ ଆହୁରୀ ଅଧିକ ୩ ମାସ କାରାଦଣ୍ଡାଦେଶ ପ୍ରଦାନ କରିଛନ୍ତି। ସରକାରଙ୍କ ପକ୍ଷରୁ ମାମଲାକୁ ସ୍ୱତନ୍ତ୍ର ଭିଜିଲାନସ ପିପି ଭି. ଭି.ରାମଦାସ ପରିଚାଳନା କରୁଥିଲେ।
Comments are closed.