ଖୋର୍ଦ୍ଧା- ବଲାଙ୍ଗିର ରେଳପଥ ପ୍ରକଳ୍ପ ଜମି ଅଧିଗ୍ରହଣ, ୨୩୭୪ ଗୋଟି ଖାତାର ଜମି ମାଲିକ ପାଇଛନ୍ତି କ୍ଷତିପୂରଣ

ବୌଦ୍ଧ: ଖୋର୍ଦ୍ଧା- ବଲାଙ୍ଗିର ରେଳପଥ ପ୍ରକଳ୍ପ କାର୍ଯ୍ୟ ବୌଦ୍ଧଜିଲାରେ ଚାଲୁ ରହିଥିବା ବେଳେ ଚଳିତ ବର୍ଷ ଏହି ପ୍ରକଳ୍ପ ପାଇଁ କେନ୍ଦ୍ର ସରକାର କେନ୍ଦ୍ରୀୟ ଅନୁଦାନ ସର୍ବାଧିକ ଦେଇଛନ୍ତି। ଜମି ଅଧିଗ୍ରହଣକୁ ନେଇ ରାଜ୍ୟ ଓ କେନ୍ଦ୍ର ସରକାର ଭିତରେ ଦୀର୍ଘ ଦିନ ଧରି ସମସ୍ୟା ଲାଗିରହିଥିଲା। ଜିଲାରେ ରେଳପଥ କାର୍ଯ୍ୟରେ ଜଙ୍ଗଲ ଜମି ବାଧକ ସାଜୁଥିବା ବେଳେ ଇତି ମଧ୍ୟରେ କେନ୍ଦ୍ର ସରକାରଙ୍କ ପକ୍ଷରୁ ଜଙ୍ଗଲ ଜମି ଅଧିଗ୍ରହଣ ପାଇଁ ପରିବେଶ ମଞୁରୀ ମିଳିସାରିଛି।

ଯାହାଫଳରେ କାର୍ଯ୍ୟରେ ତ୍ୱରାନ୍ନିତ ହେବାର ସମ୍ଭାବନା ରହିଛି। ଖୋର୍ଦ୍ଧା- ବଲାଙ୍ଗିର ରେଳପଥ ବୌଦ୍ଧଜିଲାରେ ସର୍ବାଧିକ ଶହେ କିଲୋ ମିଟରରୁ ଅଧିକ ରହିଛି। ଜିଲାର ୯୮ ଗୋଟି ଗ୍ରାମର ୨୦୫୮ ଏକର ଜମି ୨୬୩୨ ଖାତାରେ ରହିଛି। ସେଥିମଧ୍ୟରୁ ୨୩୭୪ ଗୋଟି ଖାତାର ଜମି ମାଲିକ ଅର୍ଥ ପାଇଥିବା ଜଣାପଡିଛି। ସେହିପରି ୨୬୮ ଗୋଟି ଖାତାର ଅର୍ଥ ବିଭିନ୍ନ କାରଣରୁ ଦିଆଯାଇ ପାରିନାହିଁ।

ବିଭିନ୍ନ ସ୍ଥାନରେ ଅଧିଗ୍ରହଣ ଜମିର ମୂଲ୍ୟକୁ ନେଇ ଜମି ମାଲିକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଭଉଁରୀପଥର ଗ୍ରାମର ୧୩ ଗ୍ରାମର ହିତାଧିକାରୀ ଜମି ଅଧିଗ୍ରହଣ ଅର୍ଥ ନେଇ ନ ଥିବା ବେଳେ କୋର୍ଟରେ ମାମାଲା ରୁଜୁ ହୋଇଥିବା ଜଣାପଡିଛି। ବିଭାଗୀୟ ଅଧିକାରୀ ଓ ଜିଲା ପ୍ରଶାସନ ପକ୍ଷରୁ ତଦାରଖ କାର୍ଯ୍ୟ ଠିକ ଭାବରେ ହେଲେ ଏହି ବହୁ ପ୍ରତିକ୍ଷିତ ଖୋର୍ଦ୍ଧା-ବଲାଙ୍ଗିର ରେଳପଥ କାର୍ଯ୍ୟ ଖୁବ ଶିଘ୍ର ଶେଷ ହେବାର ସମ୍ଭାବନା ରହିଛି।