ରେଙ୍ଗାଲିକ୍ୟାମ୍ପ: ଅତାବିରା ଥାନା ଅନ୍ତର୍ଗତ ଗୋଡ଼ଭଗା ଫାଣ୍ଡି ଅଧିନସ୍ଥ ଭାଲୁ ଡୁଙ୍ଗୁରି ୫୪ ନମ୍ବର ରାଜ୍ୟ ରାଜପଥ ଉପରେ ଶ୍ରୀରାମ ତେଲ କଳ ସମ୍ମୁଖରେ ଗୁରୁବାର ଘଟିଛି ଏକ ମର୍ମନ୍ତୁଦ ସଡ଼କ ଦୁର୍ଘଟଣା। ଏଥିରେ ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଛି। ଖବର ପାଇ ଗୋଡ଼ଭଗା ଫାଣ୍ଡି ଅଧିକାରୀ ପ୍ରଫୁଲ୍ଲ କୁମାର ପୁରୋହିତ ପହଞ୍ଚି ମୃତଦେହ ଜବତ କରିବା ସହ ଅତାବିରା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆଣି ଏହି ଘଟଣାର ତଦନ୍ତ ଆରମ୍ଭ କରିଛନ୍ତି।
ପୁଲିସ ସୂତ୍ରରୁ ଜଣାପଡ଼ିଛି ଯେ, ଗୋଡ଼ଭଗା ଅଭିମୁଖେ ଆସୁଥିବା ଏକ ବୋଲେରୋ ପିକଅପ୍ ସମ୍ମୁଖରେ ଆସୁଥିବା ଏକ ବାଇକକୁ ଧକ୍କା ଦେବା ଫଳରେ ବାଇକ୍ ଆରୋହୀଙ୍କର ଘଟଣା ସ୍ଥଳରେ ମୃତ୍ୟୁ ଘଟିଛି। ଉକ୍ତ ବୋଲେରୋ ଧକ୍କା ଦେଇ ଫେରାର ମାରିଥିବାବେଳେ ସ୍ଥାନୀୟ ଲୋକେ ତାକୁ ଧରିବାକୁ ଚେଷ୍ଟା କରିଥିଲେ ମଧ୍ୟ ସଫଳ ହୋଇପାରି ନଥିଲେ। ପୁଲିସକୁ ବିଶ୍ଵସ୍ତ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଉକ୍ତ ବୋଲେରୋ ଗାଡିର ମାଲିକ ମଲ୍ଲିକପଡ଼ା ଗ୍ରାମର ବିରେନ୍ଦ୍ର ପ୍ରସାଦ ଗୁପ୍ତା ବୋଲି ଜଣାପଡିଛି। ତେବେ ଗାଡ଼ି କିଏ ଚଲାଉଥିଲେ, ଡ୍ରାଇଭର ନା ନିଜେ ମାଲିକ ତାହା ଜଣାପଡିନାହିଁ। ମୃତ ବାଇକ୍ ଆରୋହୀ ଯୁବକଙ୍କ ପରିଚୟ ଜଣାପଡିନାହିଁ। ଶବ ବ୍ୟବଚ୍ଛେଦ ପାଇଁ ପୁଲିସ ମୃତ ଶରୀରକୁ ବରଗଡ଼ ଖେଦାପାଲିକୁ ପଠାଯାଇଛି।
Comments are closed.