ବଲାଙ୍ଗିର: ସହରର ପ୍ରଖ୍ୟାତ ଜ୍ୟୋତିର୍ବିଦ ଅମରେନ୍ଦ୍ର ମିଶ୍ର ଆଉ ନାହାନ୍ତି। ଗୁରୁବାର ସନ୍ଧ୍ୟା ପ୍ରାୟ ୫.୧୫ ସମୟରେ ତାଙ୍କର ଦେହାନ୍ତ ଘଟିଛି। ଚାରି ବର୍ଷ ତଳେ ମସ୍ତିଷ୍କ ଘାତ ହେବା ପରେ ସେ ନିଜ ଠିକାଦାର ପଡା ଘରେ ରହି ଚିକିତ୍ସିତ ହେଉଥିଲେ। ଦୁଇ ଦିନ ତଳେ ତାଙ୍କର ଅବସ୍ଥା ଗୁରୁତର ହୋଇଥିବା ବେଳେ ଗୁରୁବାର ସନ୍ଧ୍ୟାରେ ତାଙ୍କର ପ୍ରାଣ ବାୟୁ ଉଡି ଯାଇଥିଲା। ମୃତ୍ୟୁ ସମୟରେ ତାଙ୍କୁ ୭୫ ବର୍ଷ ହୋଇଥିଲା। ଶେଷ ସମୟରେ ସହଧାର୍ମିଣୀ ଜନକ, ପୁତ୍ର ସ୍ମାରକ, ପୁତ୍ରବଧୁ ଯସ୍ମୀନୀ, ଭାଇ ସୁଜ୍ଞାନେନ୍ଦ୍ର, ସୁଧୀର, ଶୈଳେନ୍ଦ୍ର ଓ ଧର୍ମେନ୍ଦ୍ର ଉପସ୍ଥିତ ଥିଲେ।
ପାର୍ଥିବ ଶରୀରର ଅନ୍ତେଷ୍ଟି କ୍ରିୟା ବିଭୁତି ପଡା ସ୍ଥିତ ସ୍ୱର୍ଗଦ୍ୱାର ଠାରେ କରାଯାଇଥିବା ବେଳେ ପୁତ୍ର ସ୍ମାରକ ମୁଖାଗ୍ନି ଦେଇଥିଲେ। ସ୍ବର୍ଗତ ଅମରେନ୍ଦ୍ର ମିଶ୍ର ତରଭା ବ୍ଲକ ସରଗଜ ଗ୍ରାମରେ ଏକ ଚାଷୀ ପରିବାରରେ ଜନ୍ମ ଗ୍ରହଣ କରିଥିଲେ। ନିଜସ୍ୱ ଉଦ୍ୟମ ଓ କଠିନ ପରିଶ୍ରମ ବଳରେ ସେ ନିଜ ଗ୍ରାମ ସରଗଜ ହାଇସ୍କୁଲରେ ବିଜ୍ଞାନ ଶିକ୍ଷକ ହୋଇ ପାରିଥିଲେ। ପରେ ବଲାଙ୍ଗୀର ପି ପି ଏକାଡେ଼ମୀ ସ୍କୁଲରେ ଦୀର୍ଘ ସମୟର ଶିକ୍ଷକତା ପରେ ପ୍ରଧାନଶିକ୍ଷକ ହୋଇ ଶିକ୍ଷକତା ଜୀବନର ଅନ୍ତ କରିଥିଲେ। ସ୍କୁଲର ଉନ୍ନତି ପାଇଁ ତାଙ୍କର ପ୍ରଚେଷ୍ଟା ତାଙ୍କ ପାଇଁ ବିଭିନ ସରକାରୀ ସମ୍ମାନ ଆଣି ଦେଇଥିଲା। ଚାକିରୀ ପରବର୍ତ୍ତୀ ଜୀବନରେ ସେ ଆଖ ପାଖ ଅଞ୍ଚଳର ଏକ ପ୍ରଖ୍ୟାତ ଜ୍ୟୋତିର୍ବିଦ ହୋଇ ପାରିଥିବା ବେଳେ ଜନସାଧାରଣଙ୍କ ମଧ୍ୟରେ ତାଙ୍କର ବେଶ ସୁଖ୍ୟାତି ରହିଥିଲା। ଏଭଳି ଜଣେ ବ୍ୟକ୍ତିଙ୍କ ବିୟୋଗରେ ଅଂଚଳରେ ଶୋକର ଛାୟା ଖେଳିଯାଇଛି।
Comments are closed.