ବଲାଙ୍ଗିର: ବଲାଙ୍ଗିର ଟାଉନ ଥାନାର ରାଜୀବ ନଗରରେ ବୁଧୁବାର ମଧ୍ୟାହ୍ନ ସମୟରେ ମରଣାନ୍ତକ ଆକ୍ରମଣ ହୋଇଛି। ଏଥିରେ ଆହତ ୩ ଜଣଙ୍କୁ ସ୍ଥାନୀୟ ଭୀମ ଭୋଇ ଡାକ୍ତରଖାନାରେ ଚିକିତ୍ସା କରାଯାଇଛି।
ସୂଚନା ଅନୁସାରେ, ସର୍ବେଶ୍ବର ସାହୁଙ୍କ ଘର ରାଜୀବ ନଗର। ଘରେ ଜ୍ବାଇଁ ସୁମନ ପାଣିଗ୍ରାହୀ, ଝିଅ ପିଙ୍କି ଓ ଅନ୍ୟମାନେ ଥିଲେ। ୫/୬ଜଣ ଯୁବକ ୨ଟି ଟାଙ୍ଗିଆ ଧରି ଘରେ ପହଞ୍ଚି ଅତର୍କିତ ଆକ୍ରମଣ କରିଥିଲେ। ଶ୍ବଶୁର ସର୍ବେଶ୍ବର ଟାଙ୍ଗିଆ ଧରିଥିବା ଯୁବକଙ୍କୁ କାବୁ କରିଥିଲେ। ଅନ୍ୟ ଆକ୍ରମଣକାରୀ ଘରେ ପଶି ସୁମନ, ପିଙ୍କିଙ୍କୁ ଆକ୍ରମଣ କରି ରକ୍ତାକ୍ତ କରି ଦେଇଥିଲେ। ଘଟଣା ପରେ ଆକ୍ରମଣକାରୀ ଫେରାର ହୋଇଯାଇଥିଲା। ସ୍ଥାନୀୟ ଲୋକେ ଆହତଙ୍କୁ ଭୀମ ଭୋଇ ଡାକ୍ତରଖାନାରେ ଭର୍ତ୍ତି କରିଥିବା ଜଣାପଡିଛି। ପୂର୍ବ ଶତ୍ରୁତାକୁ କେନ୍ଦ୍ର କରି ଏହି ମରଣାନ୍ତକ ଆକ୍ରମଣ କରାଯାଇଥିବା ସୂଚନା ମିଳିଛି। ଖବର ପାଇ ସହରାଞ୍ଚଳ ପୁଲିସ ଖୋଳତାଡ ଆରମ୍ଭ କରିଛି।
