କୁଆଲାଲୁମ୍ପୁର : ମାଲେସିଆର ଉପକୂଳରେ ବୁଧବାର ଏକ ବାଲି ବୋଝେଇ ଜାହାଜ ବୁଡିଯିବାରୁ ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଛି। ଏହି ଘଟଣାରେ ଅନ୍ୟ ୧୦ ଜଣଙ୍କ ସମ୍ବନ୍ଧରେ କୌଣସି ସୂଚନା ମିଳି ନାହିଁ। ସେମାନେ ବୁଡିଯାଇଥିବା ଜାହାଜ ତଳେ ପୋତି ହୋଇପଡିଥିବା ଅନୁମାନ କରାଯାଉଛି। ମଉର ଜିଲା ନିକଟରେ ଏହି ଦୁର୍ଘଟଣା ଘଟିଥିବା ନେଇ ସକାଳ ୮ଟା ୩୦ରେ ମାଲେସିଆ ତଟରକ୍ଷୀ ବାହିନୀକୁ ସୂଚନା ମିଳିଥିଲା। ତଟରକ୍ଷୀ ବାହିନୀର ଦୁଇଟି ବୋଟ୍କୁ ତୁରନ୍ତ ଘଟଣାସ୍ଥଳକୁ ପଠାଯାଇ ପରିସ୍ଥିତି ଅନୁଧ୍ୟାନ କରାଯାଇଥିଲା। ଇତିମଧ୍ୟରେ ଜଣେ ବ୍ୟକ୍ତିଙ୍କ ମୃତଦେହ ମିଳିଥିବା ବେଳେ ସେ ଚୀନ୍ ବାସିନ୍ଦା ବୋଲି ଜଣାପଡିଛି। ଅନ୍ୟ ତିନି ଜଣଙ୍କୁ ଜୀବିତ ଅବସ୍ଥାରେ ତଟରକ୍ଷୀ ବାହିନୀ ଉଦ୍ଧାର କରିଛି। ଉକ୍ତ ଜାହାଜରେ ୧୪ ଜଣ ଥିଲେ। ସେମାନଙ୍କ ମଧ୍ୟରୁ ୧୨ ଜଣ ଚୀନ୍, ଜଣେ ଇଣ୍ଡୋନେସିଆ ଏବଂ ଅନ୍ୟ ଜଣେ ମାଲେସିଆ ବାସିନ୍ଦା ବୋଲି ସୂଚନା ମିଳିଛି। ନିଖୋଜ ଥିବା ୧୦ ଜଣ ନାବିକଙ୍କ ସନ୍ଧାନ ଜାରି ରହିଛି। ଏହି ଦୁର୍ଘଟଣାର କାରଣ ଜଣାପଡି ନାହିଁ।
