ପୋର୍ଟବ୍ଲେୟାର: ଆଣ୍ଡାମାନ ଓ ନିକୋବର ଦ୍ବୀପପୁଞ୍ଜ ପ୍ରଶାସନ ପକ୍ଷରୁ ପ୍ରଥମ ଥର ପାଇଁ ଜରାୱା ଜନଜାତିକୁ ଭୋଟର ତାଲିକାଭୁକ୍ତ କରାଯାଇଛି। ବୁଧବାର ଏହି ସଂପ୍ରଦାୟର ୧୯ ଜଣ ସଦସ୍ୟଙ୍କୁ ଭୋଟର ପରିଚୟ ପତ୍ର ପ୍ରଦାନ କରାଯାଇଛି। ଏହି ସଂପ୍ରଦାୟ ସାଉଥ୍ ଆଣ୍ଡାମାନର ଜିର୍କାତାଙ୍ଗରେ ବାସ କରୁଛନ୍ତି। ଆଧୁନିକ ସଭ୍ୟ ସମାଜ ସହ ଏମାନଙ୍କର ସଂପୃକ୍ତି ନ ଥିବାରୁ ସେମାନେ ଏକାନ୍ତବାସରେ ରହିବାକୁ ପସନ୍ଦ କରିଥାନ୍ତି। ତେବେ ସେମାନଙ୍କୁ ଗଣତାନ୍ତ୍ରିକ ପ୍ରକ୍ରିୟାରେ ସାମିଲ କରାଯିବା ଏକ ଉଲ୍ଲେଖନୀୟ ଘଟଣା ବୋଲି ଆଣ୍ଡାମାନ ମୁଖ୍ୟ ଶାସନ ସଚିବ ଚନ୍ଦ୍ରଭୂଷଣ କୁମାର କହିଛନ୍ତି। ପ୍ରଥମେ ଏହି ସଂପ୍ରଦାୟର ଲୋକେ ଭୋଟର ପରିଚୟ ପ୍ରକ୍ରିୟାରେ ସାମିଲ ହେବାକୁ କୁଣ୍ଠାବୋଧ କରୁଥିଲେ। ତେବେ ‘ଆଣ୍ଡାମାନ ଆଦିମ ଜନଜାତି ବିକାଶ ସମିତି’ କର୍ମକର୍ତ୍ତାମାନେ ପ୍ରବର୍ତ୍ତାଇବା ପରେ ସେମାନେ ଏହି ପ୍ରସ୍ତାବରେ ରାଜି ହୋଇଛନ୍ତି। ଜରାୱା ଜନଜାତି ଆଣ୍ଡାମାନର ମୂଳ ଅଧିବାସୀ ହୋଇଥିବାବେଳେ ସେମାନେ ଜଙ୍ଗଲଜାତ ଦ୍ରବ୍ୟ ବିକ୍ରି କରି ଜୀବିକା ଉପାର୍ଜନ କରିଥାନ୍ତି। ସମାଜର ମୁଖ୍ୟ ସ୍ରୋତରୁ ଅଲଗା ରହିଥିବା ଏହି ଜନଜାତି ନିଜସ୍ବ ସଂସ୍କୃତି ଓ ପରମ୍ପରାକୁ ବଜାୟ ରଖିବାରେ ବିଶ୍ବାସ କରିଥାନ୍ତି।
Popular Categories
Previous article
Next article