ନୂଆଦିଲ୍ଲୀ: ଦିଲ୍ଲୀ ବିଧାନସଭା ନିର୍ବାଚନରେ ଶାସକ ଆମ୍ ଆଦମୀ ପାର୍ଟି (ଆପ୍) ଓ କଂଗ୍ରେସ ମଧ୍ୟରେ ମେଣ୍ଟ ହୋଇପାରି ନାହିଁ। ବିରୋଧୀ ‘ଇଣ୍ଡି’ ମେଣ୍ଟର ଅଂଶୀଦାର ଥିବା ଏହି ଦୁଇ ଦଳ ଅଲଗା ଅଲଗା ନିର୍ବାଚନ ଲଢିବାକୁ ନିଷ୍ପତ୍ତି ନେଇଛନ୍ତି। ଏ ପରିସ୍ଥିତିରେ ଆପ୍ ପ୍ରତି ଇଣ୍ଡି ମେଣ୍ଟର ଅନ୍ୟ ଅଂଶୀଦାର ଦଳଗୁଡିକ ସମର୍ଥନ ବ୍ୟକ୍ତ କରିଥିବାବେଳେ କଂଗ୍ରେସ ଏକ ଘରିକିଆ ହୋଇପଡିଛି। ଦିଲ୍ଲୀ ନିର୍ବାଚନରେ ଆପ୍କୁ ସମର୍ଥନ ଜଣାଇଛନ୍ତି ମମତା ବାନାର୍ଜୀଙ୍କ ତୃଣମୂଳ କଂଗ୍ରେସ ଓ ଅଖିଳେଶ ଯାଦବଙ୍କ ସମାଜବାଦୀ ପାର୍ଟି। ଏହା ବ୍ୟତୀତ ଉଦ୍ଧବ ଠାକରେଙ୍କ ଶିବସେନା ୟୁବିଟି ମଧ୍ୟ ଆପ୍କୁ ସମର୍ଥନ ଜଣାଇବାର ସମ୍ଭାବନା ରହିଛି। ତୃଣମୂଳ କଂଗ୍ରେସ (ଟିଏମସି) ଆପ୍କୁ ନିଜର ସମର୍ଥନ ଜଣାଇବା ପରେ ଅରବିନ୍ଦ କେଜରିୱାଲ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଧନ୍ୟବାଦ ଜଣାଇଛନ୍ତି। ମମତାଙ୍କ ପରେ ଅଖିଳେଶ ଯାଦବ ଆପ୍କୁ ନିଜର ସମର୍ଥନ ଜଣାଇଛନ୍ତି। ସେହିପରି ଶିବସେନା ୟୁବିଟିର ସମର୍ଥନ ପାଇବା ଲାଗି କେଜରିୱାଲ ଉଦ୍ଧବ ଠାକରେଙ୍କ ସହ ଆଲୋଚନା ଚଳାଇଛନ୍ତି।
ଦିଲ୍ଲୀ ନିର୍ବାଚନ ଅଲଗା ଲଢିବାକୁ ନିଷ୍ପତ୍ତି ନେବା ପରେ କଂଗ୍ରେସ ଓ ଆପ୍ ପରସ୍ପର ବିରୋଧରେ ଆରୋପ ପ୍ରତ୍ୟାରୋପ ଚଳାଇଛନ୍ତି। ନିକଟରେ କଂଗ୍ରେସ ଆପ୍ ଓ ଏହାର ମୁଖ୍ୟ ଅରବିନ୍ଦ କେଜରିୱାଲଙ୍କୁ ‘ଫର୍ଜିୱାଲା’ କହି ସମାଲୋଚନା କରିଥିଲା। ଏପରି ସମାଲୋଚନା ପରେ କଂଗ୍ରେସକୁ ଇଣ୍ଡି ମେଣ୍ଟରୁ ହଟାଇବା ଲାଗି ଆପ୍ କହିଥିଲା। ଏହା ପୂର୍ବରୁ ଇଣ୍ଡି ମେଣ୍ଟର ନେତୃତ୍ବ ନେବାରେ କଂଗ୍ରେସ ବିଫଳ ହୋଇଥିବା ଅଂଶୀଦାର ଦଳଗୁଡିକ କହିଥିଲେ। କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେଙ୍କ ପରିବର୍ତ୍ତେ ଟିଏମସି ମୁଖ୍ୟ ମମତା ବାନାର୍ଜୀଙ୍କୁ ଇଣ୍ଡି ମେଣ୍ଟର ନେତା କରିବାକୁ ଅଂଶୀଦାର ଦଳ ଗୁଡିକ ମଧ୍ୟରେ ଆେଲାଚନା ହୋଇଥିଲା। ଫେବୃଆରୀ ୫ରେ ୭୦ ଆସନ ବିଶିଷ୍ଟ ଦିଲ୍ଲୀ ବିଧାନସଭା ନିର୍ବାଚନ ପାଇଁ ଭୋଟ ଗ୍ରହଣ ହେବ। ନିର୍ବାଚନ ତାରିଖ ଘୋଷଣା ପରେ ରାଜନୈତିକ ଦଳଗୁଡିକ ପ୍ରଚାର ଜୋରଦାର ଆରମ୍ଭ କରିଛନ୍ତି। ତେବେ ଏହି ପ୍ରଚାର ମଇଦାନକୁ କଂଗ୍ରେସର ବରିଷ୍ଠ ନେତା ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀ ଓ ମଲ୍ଲିକାର୍ଜୁନ ଖଡଗେ ଓହ୍ଲାଇ ନାହାନ୍ତି।
Comments are closed.