ବୀରମହାରାଜପୁର: ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଖଣ୍ଡହତା ପଞ୍ଚାୟତ ଅନ୍ତର୍ଗତ ଅଡାଳ ଗ୍ରାମରେ ବୁଧବାର ରାସ୍ତା ପ୍ରଶସ୍ତିକରଣ ପାଇଁ ଜବରଦଖଲ ଉଚ୍ଛେଦ କରାଯାଇଛି । ଦୀର୍ଘଦିନ ହେଲା ଏଠାରେ ରାସ୍ତା ଦୁଇ ପାର୍ଶ୍ଵରେ ଅବରୋଧ ସୃଷ୍ଟି ହୋଇଥିଲା । ଅନେକ ଲୋକ ଘର ଏବଂ ଦୋକାନ କରି ରାସ୍ତା ଦୁଇ ପାଖରେ ବସବାସ କରି ଆସୁଥିଲେ । ଏଥିପାଇଁ ବୀରମହାରାଜପୁର ତହସିଲଦାରଙ୍କ ପକ୍ଷରୁ ବିଭିନ୍ନ ସମୟରେ ଜବରଦଖଲ ଉଚ୍ଛେଦ ପାଇଁ ନୋଟିସ ଜାରି କରାଯାଇଥିଲା । ନିକଟରେ ଖଣ୍ଡହତା-ମୁର୍ଷୁଣ୍ଢି ରାସ୍ତାର ପ୍ରଶସ୍ତିକରଣ ଚାଲିଥିବାରୁ ଏହା ଅତ୍ୟାବଶ୍ୟକ ହୋଇପଡ଼ିଥିଲା । ମାତ୍ର ଜବର ଦଖଲକାରୀମାନେ ତହସିଲର ନୋଟିସକୁ ଖାତିର କରି ନଥିଲେ । ଶେଷରେ ଆଜି ବାଧ୍ୟହୋଇ ପ୍ରଶାସନ ପକ୍ଷରୁ ଜେସିବି ସାହାଯ୍ୟରେ ଜବରଦଖଲ ଉଚ୍ଛେଦ କରାଯାଇଥିବା ଜଣାପଡ଼ିଛି । କିଛି ଲୋକ ନିଜ ଆଡୁ ମଧ୍ୟ ଜବରଦଖଲ ହଟାଇ ନେଇଥିଲେ । ଉଚ୍ଛେଦ ବେଳେ ପ୍ରଶାସନ ପକ୍ଷରୁ ସ୍ଥାନୀୟ ଅତିରିକ୍ତ ତହସିଲଦାର ସ୍ବାଗତ ପଣ୍ଡା, ରାଜସ୍ବ ବିଭାଗ କର୍ମଚାରୀ ଓ ପୁଲିସ କର୍ମଚାରୀମାନେ ଉପସ୍ଥିତ ଥିଲେ ।
Comments are closed.