ନୂଆଦିଲ୍ଲୀ: ବିଶ୍ୱରେ ଆତଙ୍କବାଦ ଭଳି ଦେଖାଦେଇଥିବା ସମାଜ ବିରୋଧୀ ତତ୍ୱଗୁଡିକର ମୁକାବିଲା ଦିଗରେ ବିଶ୍ୱ ଆଗେଇ ଆସିବା ଉଚିତ ବୋଲି ବୈଦେଶିକ ମନ୍ତ୍ରୀ ଡଃ ଏସ. ଜୟଶଙ୍କର କହିଛନ୍ତି। ସେ ଆଜି ଅଷ୍ଟାଦଶ ବିମ୍ଷ୍ଟେକ୍ ମନ୍ତ୍ରିସ୍ତରୀୟ ବୈଠକରେ ଅଂଶ ଗ୍ରହଣ କରି କହିଛନ୍ତି ଯେ ଭାରତ ସର୍ବଦା ଏଭଳି ପଦକ୍ଷେପ ଗ୍ରହଣ ଦିଗରେ ତାର ସକାରାତ୍ମକ ମନୋଭାବ ପ୍ରଦର୍ଶନ କରିଛି ଓ କରିବ ମଧ୍ୟ।
ଶ୍ରୀଲଙ୍କାର କଲମ୍ବୋରେ ଅନୁଷ୍ଠିତ ଏହି ବୈଠକରେ ଡଃ ଜୟଶଙ୍କର କହିଛନ୍ତି, ବିମଷ୍ଟେକ ସଦସ୍ୟ ରାଷ୍ଟ୍ରଗୁଡିକ ଯୋଗାଯୋଗ, ଶକ୍ତି ଓ ସାମୁଦ୍ରିକ ସହଯୋଗ କ୍ଷେତ୍ରରେ ସେମାନଙ୍କ ମଧ୍ୟରେ ସହଯୋଗ ବୃଦ୍ଧି କରିବା ଜରୁରୀ। ସେ କହିଛନ୍ତି, ସଦସ୍ୟ ଦେଶମାନେ ବ୍ୟବସାୟ କ୍ଷେତ୍ରରେ ମିଳିତ ଉଦ୍ୟୋଗ ସ୍ଥାପନ ସହ ପ୍ରକଳ୍ପଗୁଡ଼ିକର ମିଳିତ କାର୍ଯ୍ୟକାରୀତା ଜରୁରୀ। ବନ୍ଦର ସୁବିଧା, ଫେରୀ ସେବା, ଉପକୂଳ ଜାହାଜ ଚଳାଚଳ, ଗ୍ରୀଡ୍ ସଂଯୋଗ ଓ ମୋଟର ଯାନ ଚଳାଚଳ ଭଳି କ୍ଷେତ୍ରରେ ମଧ୍ୟ ସହଯୋଗ ବୃଦ୍ଧି କରାଯାଇ ପାରିବ ବୋଲି ସେ କହିଛନ୍ତି। ବିମଷ୍ଟେକ ସଦସ୍ୟ ଦେଶଗୁଡିକ ମିଳିତ ଭାବେ ଆତଙ୍କବାଦ, ଉଗ୍ରବାଦ, ଆନ୍ତର୍ଜାତିକ ଅପରାଧ, ସାଇବର ଅପରାଧ ଓ ନିଶାଦ୍ରବ୍ୟର ଚୋରା ଚାଲାଣ ଭଳି କାର୍ଯ୍ୟକଳାପଗୁଡ଼ିକର ମୂଳୋତ୍ପାଟନ କରିପାରିବେ ବୋଲି ଡଃ ଜୟଶଙ୍କର କହିଛନ୍ତି।
